Бюджет ахъщэр зэрагъэзекIорэм цIыфхэр къыхэгъэлэжьэгъэнхэм тегъэпсыхьэгъэ Iофхэм къа­дыхэлъытагъэу Кощхьэблэ районым объект зэфэшъхьафхэм яшIын чанэу щылъагъэкIуатэ.

Ахэм ащыщэу зым итын шIэхэу зэшIуахыщт. «Инициативное бюджетирование» зыфиIорэ шъолъыр программэм къыдыхэлъытагъэу къутырэу Натырбые дашIыхьэрэ спорт гупчэр ары зигугъу тшIырэр. Къоджэ псэупIэм иадминист­рацие тызэрэщигъэгъозагъэмкIэ, мы Iофыгъом изэшIохын сомэ мин 970-рэм ехъу пэIу­хьанэу щыт.

— Программэр ары зыфытегъэпсыхьагъэр — псэупIэм дэсхэм япроект къагъэлъагъо, нэужым ащ игъэцэкIэни хэлажьэх. Къутырым дэсхэр зы­хэлэжьэхэрэ апэрэ псэуалъэу мыр щытэп. ГъэрекIо ащ къыдэуцогъэ «ШIэжьым иаллее» ишIыни хэлэжьагъэх. Джащ фэдэу программэм чанэу хэлажьэх еджэркъуаехэр, фэдзхэр, кощхьаблэхэр, Вольнэм ыкIи Игнатьевскэм ащыпсэу­хэрэр, — къыщыхагъэщыгъ Кощхьэблэ районым ипресс-­къулыкъу.