УФ-м и Правительствэ унашъо ышIыгъ Iэпэ­чIэгъэнэ фондым къыхэхыгъэ сомэ миллион 67-рэ Адыгеим къыфитIупщынэу. Мылъку тедзэр атырагощэщт медицинэм иIофышIэхэу коронавирусым пэуцу­жьыхэрэм ыкIи узыр къапыхьанымкIэ щынагъо зышъхьащытхэм.

Адыгэ Республикэм и ЛIы­шъхьэу КъумпIыл Мурат къызэрэхигъэщыгъэмкIэ, пандемием илъэхъан мафэ къэс фе­деральнэ пащэхэр IэпыIэгъу къазэрэфэхъухэрэм къыкIэлъыкIоу псауныгъэр къэухъумэгъэнымкIэ, социальнэ лъэныкъомкIэ пшъэрылъхэр шIуагъэ къытэу шъолъырхэм зэшIуахынхэ алъэкIы.

— Урысыем и Президентэу Владимир Путиным пшъэрылъ шъхьаIэу къыгъэуцугъэхэм къа­дыхэлъытагъ цIыфхэм, бизнесым, врачхэм, социальнэ IофышIэхэм, мы зэпахырэ узым пэуцужьырэ пстэуми IэпыIэгъу афэхъугъэныр. Ар зэрифэ­шъуашэу гъэцэкIэгъэным тыпылъ, ащкIэ къэралыгъом ипра­вительствэрэ депутатхэмрэ яшIуагъэу къытагъэкIырэр зэ­хэтэшIэ, — къыIуагъ Адыгеим и ЛIышъхьэ.

Республикэм ахъщэ тедзэ къыIэкIэхьанымкIэ унашъор ашIыгъ УФ-м и Федеральнэ ЗэIукIэ и Комиссиеу бюджет мылъкур зэрагощыщтым дэла­жьэрэм къызэрахилъхьагъэмкIэ ыкIи УФ-м и Къэралыгъо Думэ Адыгеир къыщызыгъэ­лъэгъорэ депутатэу Владислав Резник иIэпыIэгъукIэ.

АР-м и ЛIышъхьэ ипресс-къулыкъу