Урысыем и Правительствэ 2021 — 2023-рэ илъэсхэмкIэ феде­ральнэ бюджетым ипроект Къэралыгъо Думэм къащыхилъхьагъ.

Бюджетым ифедэхэми ихъардж­хэми илъэс къэс къа­хэхъонэу къырадзэ. Социальнэ лъэныкъомрэ экономикэм хэхъоныгъэ егъэшIыгъэнымрэ бюджетыкIэр атегъэпсыхьэгъэщт.

Ау джыри проектыр амы­штэзэ, Къэралыгъо Думэм ащ щытегущыIэхэу, ащкIэ шъолъырхэмрэ экспертхэмрэ яшIошIхэр зэрагъашIэу аублэщт, бюджетым зэхъокIыныгъэу фа­шIыщтхэмкIэ предложениехэр къаугъоищтых. Къэралыгъо Ду­мэм бюджетымкIэ икомитет итхьаматэу Андрей Макаровым къызэриIуагъэмкIэ, бюд­жетым ипроект чъэпыогъум и 29-м апэрэу хэплъэщтых. Мэзэ псаум комитетхэм проектым Iоф дашIэщт.

Лъэныкъуищ зыхэхьэрэ комиссиемрэ Адыгеим ыцIэкIэ Къэралыгъо Думэм ибюджет комитетрэ ахэтэу Владислав Резник бюджетым ипроект Iоф зэрэдашIэщт шIыкIэм къыте­гущыIэ.

«Урысыем и Президент Федеральнэ ЗэIукIэм фигъэхьыгъэ Тхыгъэм щигъэнэфэгъэ пшъэ­рылъхэм бюджетыкIэр зэрадиштэрэр къэсэIо. Къэралыгъо программэхэмрэ лъэпкъ про­ектхэмрэ ягъэцэкIэнкIэ ищыкIэгъэ мылъкур ащ къыщыдэ­лъытагъ. ГущыIэм пае, псауныгъэм икъэухъумэнкIэ, гъэсэ­ны­гъэмкIэ, кIэлэцIыкIухэм ахъщэ IэпыIэгъу ятыгъэнымкIэ хъардж­хэм ахэдгъэхъон тимурад.

Шъолъыр бюджетхэм Iэпы­Iэгъу афэхъугъэнымкIэ Правительствэм предложениеу къы­хьырэ пстэуми тахэплъэщт. Правительствэм тыригъусэу тишъыпкъэу мэзэ псаум Iоф тшIэщт. Хабзэ зэрэхъугъэу, бюджетым ипроекткIэ гъэтэрэзыжьынхэр илъэс къэс комиссием къахелъхьэх. БюджетыкIэр тштэ зыхъукIэ экономикэмрэ социальнэ лъэныкъомрэ яIоф­хэм язытет къыдэтлъытэщт. Зэпахырэ узым ыгъэгумэкI­хэрэм япчъагъэ къеIыхырэп, къихьащт илъэсым медицинэ, социальнэ IофышIэхэм, Iоф­шIэныр зышIокIодыгъэхэм, кIэлэцIыкIухэр зэрыс унагъохэм ахъщэ IэпыIэгъу ятыгъэнымкIэ шъолъырхэм мылъкоу ящыкIэгъэщтыр нахьыбэн ылъэкIыщт. Ащ фэдэ мылъкур мы илъэсым ибюджет къыщыдалъытэгъагъэп. Джащ пае Урысыем ­и Правительствэ мазэ къэс ахъ­щэ тедзэр IэпэчIэгъэнэ фондым къыхигъэкIыщтыгъ. Правительствэм тишъыпкъэу тыдэлажьэзэ, шъолъырхэр зыгъэгумэкIырэ Iофыгъохэр зэрэзэшIотхышъущтым сицыхьэ телъ».