Чъэпыогъум и 1-р — зыныбжь хэкIотагъэхэм я Дунэе маф. Мы мэ­фэкIым къыдыхэлъытагъэу тинахьыжъ лъапIэхэу республикэм щы­псэухэрэм афэгушIуагъэх.

Адыгеим и ЛIышъхьэу КъумпIыл Мурат иинтернет нэкIубгъо къызэрэритхагъэмкIэ, тина­хьыжъхэм лъытэныгъэ афэт­шIыным хэти ицIыкIугъом щегъэжьагъэу фапIу.

— Тикъэралыгъуи, Адыгейми, ащыпсэурэ лъэпкъ пстэуми ар яхэбзэшIу, — къыIуагъ ащ. —ЛIэшIэгъухэм азыфагу илъ зэпхыныгъэр, обществэм игу­шъхьэбайныгъэхэр гъэпытэ­гъэн­хэр, шIэныгъэу аIэкIэлъыр зэ­Iэ­пахыныр сыдигъуи нахьыжъхэм апшъэ дэкIы.

Непэрэ мафэм ехъулIэу зыныбжь илъэси 100-м нэсыгъэу ыкIи ехъугъэу нэбгырэ 26-рэ Адыгеим ис. ХэбзэшIу зэрэ­хъугъэу, илъэс къэс тихэбзэ па­щэхэр ахэм афэгушIох.

Зиунэ еблэгъагъэхэм ащыщ Мыекъуапэ щыпсэурэ илъэси 102-рэ зыныбжь Екатерина Якименкор. МэфэкI Iофтхьабзэм хэлэжьагъэх Адыгэ Рес­публикэм и Премьер-министрэ игуадзэу Наталья Широковар, IофшIэнымкIэ ыкIи социальнэ хэхъоныгъэмкIэ министрэу Мыр­зэ Джанбэч, журналистхэр.

— Адыгэ Республикэм и ЛIы­шъхьэу КъумпIыл Мурат ыцIэ­кIэ зыныбжь хэкIотагъэхэм яма­фэкIэ тыпфэгушIо. Псауныгъэ пытэ уиIэу джыри илъэсыбэ къэбгъэшIэнэу тыпфэлъаIо, — къыIуагъ Наталья Широковам.

— Сигуапэ непэ шъхьэкIафэ къысэшъухызэ садэжь шъу­къызэреблэгъагъэр, — гушIозэ къеIуатэ Екатерина Якименком. — Хэбзэ къулыкъушIэхэм тызэращымыгъупшэрэм тыгу къе­Iэты. Сыныбжь емылъытыгъэу сипсауныгъи дэгъу, силъфыгъэ­хэу, синысэу сашъхьагъ итхэм сафэраз.

Тинахьыжъ лъапIэу Екатеринэ зэо мэхъаджэм имафэхэр зэпи­чыгъэх. Медаль ыкIи орден зэ­­фэшъхьафыбэу къыратыгъэ­хэм арыгушхозэ, къэзэрэугъои­гъэ­хэм аригъэлъэгъугъэх. Тыркуем игъунапкъэхэм зэранэсыгъагъэр игукъэкIыжьхэмкIэ къы­риIоты­кIыгъ. Ишъхьэгъуси Хэгъэ­гу зэ­­ошхом хэлэжьагъ. ТIуми псаоу къагъэзэжьи, ялъфыгъитIу зэдапIугъ. Пенсием окIофэ зэпымыоу лэжьагъэ. Мы уахътэ ащ къорылъф-пхъорылъфэу 4, ахэм къакIэхъухьажьыгъэу нэ­бгыри 4 иIэх, ахэм ащыщ джы къы­фэхъущт сабыим нэнэжъыр ежэ.

— Адыгеим и ЛIышъхьэ ыцIэ­кIэ тызфэгушIорэ тинахьыжъхэр нэбгырэ 26-рэ мэхъух, — къеIуатэ Мырзэ Джанбэч. — Анахьыжъым илъэси 110-рэ ыныбжь, ащ фэдэу тиIэр нэбгыритIу, адрэхэр илъэси 100 е ащ къехъух. БлэкIыгъэ илъэсым ахэр нэбгырэ 30 хъущтыгъэх. Непэ тинахьыжъхэм шъхьакIэ­фэныгъэ зыщафэтшIырэ маф. Хэбзэ къулыкъушIэхэм язакъоп, зэкIэми нахьыжъ зиIэхэм ахэр ащыгъупшэхэ хъущтэп.

Iэшъынэ Сусан.