Адыгэ Республикэм IофшIэнымкIэ ыкIи социальнэ хэхъо­ныгъэмкIэ и Министерствэ зикIэщэкIо зэнэкъокъум изэ­фэхьысыжьхэмкIэ грантхэр къизыхыгъэхэр къэнэфагъэх ыкIи ахэр зытефэхэрэм аратыжьыгъэх.

ЗэкIэмкIи къыхагъэщыгъэр социальнэ лъэныкъом­кIэ лажьэрэ мысатыу организацие 12.

Ахэм зэу ащыщ урысые общественнэ организациеу «Урысыем истудент отрядхэр» зыфиIорэм и НыбжьыкIэ Адыгэ шъолъыр къутамэ. Ащ ипроектэу «Оперативники» зышъхьэр ары грантыр зэратыгъэр.

«Мы проектыр бэшIагъэ тиреспубликэ зищыкIагъэр, 2018-рэ илъэсым ар зэхэт­щагъ. КIэлэцIыкIу къинхэр къызхэтэщэх, ятэгъа­шIэ интернет къэкIуапIэхэм ямэ­хьанэ, мыхъо-мышIа­гъэхэр зезыхьагъэхэм ящы­сэхэмкIэ а зекIуа­кIэ­хэр зэрэмытэрэзхэр агурытэгъаIо. Урысыем ишъо­лъыр зырыз зиIэр мыщ фэдэу «Кибер отрядкIэ» тызэджагъэр. Тикъэралыгъо сэнэхьат зыщызэра­гъэгъотырэ гурыт ыкIи апшъэрэ еджапIэхэм мы проектым ехьщырхэр ащызэхащагъэх, ау тэ тищыкIагъэр арэп. Ахэм ащылажьэхэрэм IофитIу зэдахьын фае мэхъу — мыхъо-мышIагъэхэр зезыхьэхэрэм алъэхъух, ежь кIэлэегъэджапIэми щэла­жьэх. ХэбзэухъумакIохэм ящыкIагъэр бзэджэшIагъэ­хэм афэгъэхьыгъэ къэба­рэу щыIэр къыхагъэщынэу, гъогу пхэнджым техьэгъа­кIэхэр къагъотынхэу ары. «Оперативникхэр» нэбгырэ 23-рэ мэхъух — вожатитIу, зы психолог, волонтер нэбгырипшI, студентипшI. НахьыбэмкIэ Iоф зыдатшIэрэр Адыгеим иво­лонтерхэр ары. Iэпы­Iэгъу къытфэхъугъэх прокуратурэр, хэбзэухъумакIо­хэр, къэлэ администрациер. Iофыгъоу пылъыр ма­кIэп, сабый къинхэр къэтэ­гъотых, тадэгущыIэ, яшIошI­хэр къятэгъаIо, психолог­хэр къетэгъэблагъэх. Ятэ­гъэлъэгъу цIыфэу къин хэ­­фагъэмэ уазэрадэIэпы­Iэн фаер. Зыхэт купхэм къахэтэщых, обществэмкIэ мэхьанэ зиIэхэм ахэтэщэх. ГущыIэм пае, пандемиер къызежьэм тикIэлэцIыкIу­хэр гъогу-патруль къулыкъухэм IэпыIэгъу афэхъу­хэу урамхэм адытетыгъэх», — къытфиIотагъ ор­га­низа­цием ипащэу Ярослав Борсук.

Илъэсым къыкIоцI кIэлэцIыкIу 20 фэдизмэ Iоф адашIэ. ЯIофшIэгъу уахътэ аухыгъэми, сабыйхэм апы­лъых, общественнэ ушэтынхэм, кружокхэм, спортивнэ секциехэм ахащэ­хэшъ, къахэнэх. ЗыдэгущыIэщтыгъэхэ япкъыгъо-­лэгъу кIэлэцIыкIухэм къахащых, гъогу тэрэзыр ара­гъэлъэгъу.

«Джы къэкIорэ гъэм янэ-­ятэхэм Iоф адэтшIэнэу тыпылъ, — къеIуатэ тигущыIэгъу. — Унагъор ары къызэрыкIыхэрэр. Алъып­лъэхэрэп икъоу ясабыйхэм, охътабэ яIэу мэ­хъу. А уахътэр имыщы­кIэгъэ чIыпIэмэ ащагъакIо, бзэджэшIэ купхэм ахэ­хьэх. Тэ ти­гъусэхэ хъумэ уахътэ ядгъаIэрэп, Iоф го­рэхэр ятэгъашIэх.

Къэтхьыгъэ грантыр Iэ­пыIэгъушхо тфэхъущт, ащ­кIэ тызчIэс унэр дгъэцэкIэжьыщт, оборудование кIэу къэтщэфыщт, психолог нахьыбэ къедгъэкIолIэщт. КIэлэцIыкIоу Iоф зыдатшIэрэмэ ахэдгъэхъон тлъэ­кIыщт, республикэм ирайонхэми Iоф адатшIэу тыублэщт. Тхьауегъэпсэушхо етэIо КъумпIыл Мурат мыщ фэдэ проектхэр щыIэн­хэмкIэ иIахьышIу зэрэхилъхьэрэм пае».

Мыщ фэдэ Iофхэм джыри зэралъыпадзэжьыщтыр, лъэныкъо зэфэшъхьафхэм ахэр зэратегъэпсыхьэгъэщтхэр ЛIышъхьэм мызэу къыхигъэщыгъ. Мы Iофым нахь цIыфыбэ къещэлIэ­гъэн фаеу ащ елъытэ. Къэралыгъо къулыкъухэм яIоф­шIэн шIуагъэу къытырэм ащ ихьатыркIи хэхъощт.

Шъугу къэдгъэкIыжьын, икIыгъэ илъэсым елъы­тыгъэмэ, мысатыу организациехэу социальнэ лъэныкъомкIэ лажьэхэрэм ягрантхэм апэIуагъэхьащт мылъкур фэдитIоу къаIэтыгъ — сомэ миллионитфыгъэти, миллионипшI хъугъэ. Къихьащт илъэсым сомэ миллион 15-м нахь мымакIэу къатIупщын гу­хэлъхэр щыIэх. Социальнэ проектыкIэхэу охътэ кIы­хьэхэм ателъытагъэхэмрэ гукъэкI зэфэшъхьафхэмрэ пхырызыщыхэрэм IэпыIэгъу тапэкIи зэрагъотыщтыр КъумпIыл Мурат игущы­Iэхэм къащыхигъэщыгъ грантхэр изыхыгъэхэм ахэр зыщаратыжьыгъэхэ зэхахьэм. Арышъ, общест­вэм ишIуагъэ езыгъэкIынэу фаехэм ыкIи ащ дэлажьэхэрэм ащ фэдэ амал агъотын алъэкIыщт.

Хьабый Пщымаф.