«ЭкоЦентрэм» къеты
МэфэкIым хэлэжьагъ
Экологием икъэухъумэн фэгъэхьыгъэ мэфэкI Iофтхьабзэу «Западный Кавказ — это твой мир!» зыфиIоу ЗекIоным и Дунэе мафэ фэгъэхьыгъэу зэхащэгъагъэм «ЭкоЦентрэри» хэлэжьагъ.
ЧIыопсым икъэухъумэнкIэ мыкъэралыгъо Гупчэу «НАБУ-Кавказ» зыфиIорэмрэ Кавказскэ къэралыгъо биосфернэ заповедникэу Х. Г. Шапошниковым ыцIэ зыхьырэмрэ ащ кIэщакIо фэхъугъэх.
Iофтхьабзэм къыдыхэлъытагъэу, Гъозэрыплъэ ыкIыбкIэ квестхэр, зэнэкъокъу зэфэшъхьафхэр, экскурсиехэр щызэхащэгъагъэх. Анахь чанхэр шIухьафтынхэмкIэ къыхагъэщыгъэх.
Джыри зэ шъугу къэтэгъэкIыжьы
Фэтэрыбэу зэхэт унэхэм ачIэсхэм хэкIыр зыщыратэкъурэ площадкэхэм унэе автотранспортыр аIубгъэуцо зэрэмыхъущтыр мызэу-мытIоу къэтIуагъ, джыри зэ шъугу къэтэгъэкIыжьы.ХэкIыр Iузыщырэ автомашинэхэр якIолIэнхэ зэрамылъэкIырэм къыхэкIыкIэ, контейнерхэр ушъагъэу къанэхэу бэрэ къыхэкIы. Ар Мыекъуапи, поселкэхэу Яблоновскэми, Инэми ащагъэунэфы.
Бакхэр игъом умыунэкIыхэмэ хэкIыр щагуми дизы мэхъу. Емыгупшысэу къыпэкIэфэгъэ чIыпIэм машинэр щызгъэуцурэ водительхэр ары ащ зимысагъэ хэлъыр. Пыдзафэхэр Iузыщыхэрэм такъикъи 3 — 10 зы площадкэм зэрэIутынхэ фэе пIалъэу яIэр. Зитранспорт тэрэзэу зымыгъэуцугъэхэм алъыхъухэзэ а графикыри укъуагъэ мэхъу.
ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу