«Экологический Электротранспорт» зыфау­сыгъэ унэе проектым къыдыхэлъытагъэу «АР­ДЕРИЯ ТС2» зыфиIорэ автомобиль цIы­кIоу электричествэмкIэ Iоф зышIэщтыр къыдагъэкIыгъ.

Алексей Тороповыр зипэщэ купыр ары мы транспортыр къэзыугупшысыгъэр.

Мыщ фэгъэхьыгъэ къэбар АР-м и ЛIышъхьэу КъумпIыл Мурат иинстаграм нэкIубгъо къыригъэхьагъ. «Анахьэу тигуа­пэ хъугъэр проектыр щыгъэцэкIагъэ хъунэу Адыгеир къызэрэхахыгъэр ары. Апэрэ ав­то­мобиль цIыкIоу электричест­вэмкIэ Iоф зышIэщтыр псэупIэу Инэм дэт заводым щаугъоигъ. БлэкIыгъэ илъэсым Алексей Тороповым зэIукIэгъоу дысиIагъэм мыщ фэдэ гухэлъхэм тащытегущыIэгъагъ, непэ зэфэ­хьысыжьышIухэм тагъэгушIо. Автомобилым икъыдэгъэкIын дэлэжьэгъэ купым сигуапэу сы­фэгушIо», — къыхигъэщыгъ КъумпIыл Мурат.

Автомобилыр къыдэзыгъэ­кIыгъэхэм къызэраIуагъэмкIэ, апэрэ машинэм ищыкIэгъэ уплъэкIунхэр рагъэкIугъэх ыкIи къэралыгъо номерхэр палъхьагъэх. Ащ зэрифэшъуашэу гъогум къыщикIухьан фитыныгъэ иIэ хъугъэ. Зарядкэ изэу иIэ зы­хъукIэ, километри 100-м нэс къыкIун ылъэкIыщт. Розеткэу унэхэм арытхэм фэдэкIэ электроэнергиер ебгъэгъотын плъэ­кIыщт. Автомобилым уасэу иIэ­щтым джыри тегущыIагъэхэп. Бэу къыдагъэкIыныр джыри гухэлъэу щыIэхэм ащыщ. Къы­хэгъэщыгъэн фае Адыгеим ит заводым мыщ фэдэ автомобиль заулэ къыдигъэкIын фитыныгъэ къызэрэратыгъэр.

— Непэрэ мафэм ехъулIэу электричествэкIэ Iоф зышIэщт автомобильхэр чIыопсымкIэ нахь къабзэхэу ыкIи шэпхъэшIухэм адиштэрэмэ ащыщых. Ащ къыхэкIэу проектым гъэ­хъэ­гъэшIухэр зэришIыщтым сицыхьэ телъ. ТапэкIи шIэныгъэлэжь-къэу­гупшысакIохэм къаугупшысыхэрэм IэпыIэгъу тызэрафэ­хъущтым тыпылъыщт. КIэлэеджа­кIохэм творчествэмкIэ яшIэныгъэхэм ахагъэхъонхэм фэгъэ­хьыгъэ проектыр джырэблагъэ тыздэлэжьэщтхэм ащыщ, — къы­Iуагъ республикэм и ЛIышъхьэ. (Тикорр.).