АР-м мэкъу-мэщымкIэ и Министерствэ Iоныгъом и 30-м тызэрэщигъэгъозагъэмкIэ, Адыгеим ичIыгулэжьхэм гъэтхасэхэм яIожьын гъунэм рафылIагъ. ПстэумкIи гектар 102657-у мыгъэ халъхьэгъагъэм инахьыбэр Iуахыжьыгъах.

Тыгъэгъэзэ гектар 55069-м щыщэу 831-рэ къафэнагъ. Джэ­джэ, Кощхьэблэ, Мыекъопэ, Шэуджэн районхэм ыкIи Адыгэ­къалэ ячIыгулэжьхэм ар Iуа­хыжьыгъах, адрэхэм, ом ымыгъэохъухэмэ, неущ аухын гухэлъ яI. ГурытымкIэ лъытагъэу, зы гектарым центнер 21,5-рэ къырахыжьы, тонн 116789-рэ къаугъоижьыгъах.

Джэджэ районым ичIыгу­лэжьхэм анахьыбэу къырахыгъ. Тыгъэгъэзэ гектар 14163-рэ яIагъ, центнер 23,5-рэ, ари гурытымкIэ лъытагъэу, къыра­хыгъ, тонн 33333-рэ мэхъу къаугъоижьыгъэр.

Чылапхъэ ашIыщт натрыф гектар 24352-м щыщэу 17889-р аIожьыгъ. Зым, гурытымкIэ лъытагъэу, центнер 54,4-рэ къырахы. БылымIус ашIыщт натрыфыр зыщыхалъхьэгъагъэр Кощхьэблэ, Красногвардейскэ, Джэджэ, Мыекъопэ ыкIи Теуцожь районхэр ары. Гектар 1388-рэ хъущтыгъэ, ащ иIожьын аухыгъ.

Соери тичIыгулэжьхэм Iуа­хыжьыгъах. ПстэумкIи гектар 7081-рэ а культурэм рагъэубытыгъагъ, гурытымкIэ лъытагъэу, центнер 20,6-рэ къырахыгъ.

Мыгъэ Адыгеим пындж гектар 9624-рэ щыхалъхьагъ. Ащ щыщэу 3577-рэ Iуахыжьыгъ, гурытымкIэ лъытагъэу, центнер 44,2-рэ къырахы.

ЧIыгулэжьхэм гъэтхасэхэм яIухыжьын дакIоу бжыхьасэхэм япхъыни рагъэжьагъ. КIымафэр изыхыщт рапс хилъхьанэу зыгъэнэфэгъагъэхэм зэкIэми ар апхъыгъах. Джэджэ, Красногвардейскэ, Шэуджэн районхэм ячIыгулэжьхэм мэфэ зытIу хъугъэу бжыхьэсэ хьэр халъхьэ, коцым ипхъын езгъэ­жьагъэхэри тиIэх.

ХЪУТ Нэфсэт.