Зы мафэр тIоу къафалъытэщт

Медицинэм иIофышIэу корона­виру­сыкIэу COVID-19-р къызэолIагъэхэм яIазэхэрэм IофшIэгъэ илъэсэу яIэр афагъэнафэ зыхъукIэ, зы мэфэ Iоф­шIагъэр тIоу къафалъытэщт.

УФ-м и Правительствэ иунашъоу 2020-рэ илъэсым ишышъхьэIу мазэ и 6-м къыдэкIыгъэм ар щыгъэнэфагъ. Зэпахырэ узыр къызэолIагъэхэм Iоф зэра­да­шIэгъэ пIалъэр къызэрэлъытэгъэщт шэпхъэ гъэнэ­фагъэхэр тхылъым итхагъэх.

Медицинэм иIофышIэу коронавирусыр къеолIагъэу зэгуцафэхэрэр зыгъэкощыхэрэр, ар къеолIагъэу сымэджэщхэм ачIэлъхэм, пэтхъу-Iутхъу хъугъэу е тхьабыл уз зиIэхэм IэпыIэгъу язытыхэрэр, анализхэр аIызыхыхэрэр ащ къыхеубытэх.

Джащ фэдэу зы IофшIэгъу мафэр тIоу къафалъытэщт коронавирусыр къеолIагъэу е пэтхъу-Iутхъу хъугъэу, ау унэм исэу зэIазэхэрэм медицинэм иIофышIэу IэпыIэгъу язытыхэрэми.

ФэгъэкIотэнэу яIэхэр

БлэкIыгъэ 2019-рэ илъэсыр къызи­хьагъэм къыщыублагъэу пенсием зыныбжь екIолIагъэкIэ алъытэхэрэм (предпенсионеры) фэгъэкIотэнхэр яIэ хъугъэ.

Ахэм ахахьэхэрэр пенсием кIонкIэ илъэси 5 къыз­фэнагъэхэр ары. Мыгъэ пштэмэ, бзылъфыгъэу ­илъэс 52 — 57-рэ, хъулъфыгъэу — 57 — 62-рэ зыныбжьхэр ары ащ фэдэ статусым къыхиубытагъэхэр.

Пенсием зыныбжь екIолIагъэхэм фэгъэкIотэнэу яIэхэр:

1. Мы купым хахьэхэрэм диспансеризациер акIуным пае ялэжьапкIэ къызэтенэу IофшIэгъу мэфитIу аштэн фитых. Ащ пае IофшIэпIэ чIыпIэр къязытыгъэм лъэIу тхылъ фатхын ыкIи мафэхэр зэдагъэнэфэнхэ фае.

2. Ушъхьагъу гъэнэфагъэ щымыIэу IофшIапIэм къыIуигъэкIынэу IофшIэпIэ чIыпIэр къязытыгъэр фитэп. Ыныбжь пенсием зэрекIолIагъэм пае къыIузгъэкIырэм е IофшIапIэм зымыштэрэм пшъэдэкIыжь ыхьынэу Уголовнэ кодексым къыщыдэлъытагъ.

3. Пенсием ыныбжь екIолIагъэу IофшIэпIэ чIыпIэр чIинагъэмэ, пособиеу къыратыщтыр адрэхэм аратырэм нахьыбэу УФ-м ихэбзэгъэуцугъэ щыгъэнэфагъ.

4. ХэбзэIахьхэм ятынкIи мыхэм фэгъэкIотэнхэр яIэх. ГущыIэм пае, чIыгу Iахьэу сотки 6 нахьыбэ мыхъурэм пае хэбзэIахь атыщтэп, ау ащ къехъурэм тефэрэр къыфалъытэщт. Джащ фэдэу зы унэрэ зы фэтэрырэ иIэмэ, тIумэ яз паи хэбзэIахьыр ытыщтэп.

5. Субъект пэпчъ мы купым хахьэхэрэм апае фэгъэкIотэн тедзэхэр егъэнафэх. Адыгеир пштэмэ, бзылъфыгъэу илъэс 55-м, хъулъфыгъэу — 60-м зыныбжь нэсыгъэр IофшIэным иветеранэу е ащ ра­гъапшэхэрэм ахэхьэмэ, мазэ къэс ахъщэ тын къы­фэкIощт, ыпкIэ хэмылъэу цэхэр аригъэшIынхэу фитыныгъэ иI, транспортым пае хэбзэIахьэу къытефэрэм ипроцент 50-р ары ытыщтыр.

ЦIыфым пенсием ыныбжь зэрекIолIагъэр къыушыхьатыным пае лъэIу тхылъыр шIокI имыIэу ытын фаеу щытэп. НахьыбэрэмкIэ хэбзэIахьхэмкIэ къулыкъуми, республикэм ихэбзэ гъэцэкIэкIо органхэми, IофшIэпIэ чIыпIэхэр къэзытыхэрэми электроннэ шIыкIэм тетэу тхылъхэр къызIэкIагъахьэх.

ЗыгорэкIэ ПенсиехэмкIэ фондым ащ фэдэ къэбар IэкIэмылъэу къычIэкIыгъэмэ ары ежь ышъхьэкIэ екIолIэн фаеу зыхъурэр. IофшIэпIэ чIыпIэр къезытыгъэм отчетыр игъом къымытыгъэмэ ары ащ фэдэ къызыхэкIырэр. Аущтэу хъугъэмэ, цIыфыр ПенсиехэмкIэ фондым е МФЦ-м екIуалIэмэ хъущт, почтэм ифэIо-фашIэхэр е электроннэ шIыкIэр къызфи­гъэ­федэнхи ылъэкIыщт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу