«Единэ Россием» и Тхьаматэу Дмитрий Медведевым иобщественнэ приемнэ бэмышIэу цIыфхэр зырегъэблагъэхэм, программэу «Земский доктор» зыфиIорэм изегъэушъомбгъунрэ илъэсыр имыкIызэ гараж амнистием ехьылIэгъэ законым иштэнрэ япхыгъэ IофыгъохэмкIэ ыкIи нэмыкIхэмкIэ адэгущыIагъ.

«Единэ Россием» лъэны­- къуи­плIмэ Iоф зэрадишIэщт шIыкIэмкIэ партием и Тхьаматэ пшъэрылъхэр къыгъэнэфэщтых. Апэрэр зыфэгъэхьыгъэр программэу «Земский доктор» зыфиIорэм изегъэушъомбгъун ары. Пермскэ краимкIэ Краснокамскэ къэлэ сымэджэщым иврач шъхьаIэу Константин Самойловым зэрэхигъэунэфыкIыгъэмкIэ, программэм щыгъэ­нэфэгъэ шапхъэхэм псауныгъэм икъэухъумэн пылъ IофышIэхэм япчъагъэ къырагъэIыхын алъэ­кIыщт — бюрократическэ пэрыохъухэм къахэкIэу цIыфхэм ящыкIэгъэ IэпыIэгъур амыгъотэу мэхъу.

«Амал зэриIэкIэ а программэм зегъэушъомбгъугъэн фае. Нэбгырэ мин 50-м нэс зыдэс псэупIэхэм ямызакъоу, нахь псэупIэшхохэми ар ащагъэфедэнымкIэ ахъщэу джыри ящыкIэгъэщтыр къэлъытэгъэн фае. «Единэ Россием» ипащэхэм ацIэкIэ сэ тихэбзэгъэу­цухэми, гъэцэкIэкIо хабзэм инэмыкI къулыкъухэм Iоф ащызышIэхэрэми ащ фэдэ пшъэрылъ афэсшIыщт», — къыIуагъ Дмитрий Медведевым.

ЯтIонэрэ Iофыгъор зыфэгъэ­хьыгъэр ны мылъкум икъэухъу­мэн ары. АщкIэ къащэфыгъэ унэм пае зэдашIыгъэ зэзэгъыныгъэм хэбзэ кIуачIэ имыIэу залъытэкIэ, унэгъуабэмэ ны мылъкумкIэ фитыныгъэу яIа­гъэр зыпкъ рагъэуцожьын алъэкIырэп. Дмитрий Медведевым «Единэ Россием» игупчэу цIыфхэм яфитыныгъэхэр къэзы­ухъумэрэмрэ партийнэ проектэу «Унэгъо пыт» зыфиIорэмрэ пшъэрылъ афишIыгъ мы Iофыгъом изэшIохын зыфагъэзэнэу.

Фэтэрыбэу зэхэт унэхэм арысхэм яахъщэ зыпэIумы­хьэкIэ, ахэм язэIукIэ зэхамыщэу унэ ихьапIэхэм пандусхэр ащыгъэпсыгъэнхэмкIэ гъэтэрэзы­жьынхэм якъыхэхын «Единэ Россиер» ыуж ихьащт.

«МыщкIэ зэкIэми къякIущт хэкIыпIэр къэдгъотын, сэкъат­ныгъэ зиIэхэм IэпыIэгъу яттын фае, ау ахэм анэмыкI­хэу ащ щыпсэухэрэми агу къы­зэдгъаб­гъэ хъущтэп», — хигъэунэфыкIыгъ Дмитрий Медведевым.

ЯплIэнэрэ лъэныкъор гараж амнистием ехьылIэгъэ законым Iоф дэшIэгъэныр ары. 2020-рэ илъэсыр имыкIызэ ар аштэным «Единэ Россиер» ыуж итыщт.

«Единэ Россием» ифракциеу Къэралыгъо Думэм щыIэм сэ пшъэрылъ фэсшIыщт ащ фэдэ Iофхэр зэрихьанхэу ыкIи амал зэриIэкIэ нахь псынкIаIоу, илъэсэу итыр имыкIызэ, а законопроектыр аштэнэу. Сыда пIомэ, тихэгъэгу щыпсэурэ цIыфыбэмэ ар алъэIэсышъ ары», — хигъэунэфыкIыгъ партием и Тхьаматэ.

Дмитрий Медведевым къызэриIуагъэмкIэ, непэ гараж, чIыгу Iахь миллиони 3,5-м ехъу­мэ документ тэрэз апы­лъэп, цIыфхэм ялажьэ ащ хэлъэп. Зырамылъэшъухьэу, къызэрыкIо шIыкIэм тетэу ахэм атегъэ­псыхьэгъэ тхылъхэр афагъэпсын зэрэфаер «Единэ Россием» и Тхьаматэ къыIуагъ.

Дмитрий Медведевым зэрэхигъэунэфыкIыгъэмкIэ, «Единэ Россием» ипэщэ пстэуми цIыф­хэр чIыпIэхэм щарагъэблэгъэнхэ, ахэм ягумэкIыгъохэм защагъэгъозэн ыкIи ахэм язэшIо­хынкIэ IэпыIэгъу афэхъунхэ фае.

Хабзэ зэрэхъугъэу, Iоны­гъом и 25-м зэрэ Урысыеу партиеу «Единэ Россием» и Тхьаматэ иобщественнэ приемнэхэм цIыфхэр щарагъэблагъэх. «Единэ Россием» IэпыIэгъу къыфэхъух Урысыем июристхэм я Ассоциациерэ общественнэ организациеу «Воспитатели России» зыфиIорэмрэ.

«Партиеу «Единэ Россием» и Тхьаматэу Д. А. Медведевым ирегион общественнэ приемнэ Iофыгъо зэфэшъхьафхэмкIэ: псауныгъэм икъэухъумэн, гу­рыт еджапIэхэмрэ кIэлэцIыкIу IыгъыпIэмрэ гъэсэныгъэу ащарагъэгъотырэм япхыгъэ IофыгъохэмкIэ цIыфхэр щырагъэблагъэх. Ны-тыхэмрэ кIэлэегъаджэхэмрэ закъыфагъазэу мэхъу кIэлэцIыкIу IыгъыпIэхэр нахь зэтегъэпсыхьэгъэнхэм, джыри еджапIэм мыкIорэ сабыйхэм гъэсэныгъэ лъэпкъ зэфэшъхьафхэр ягъэ­гъотыгъэнхэм япхыгъэ IофыгъохэмкIэ. КIэлэцIыкIу IыгъыпIэхэм непэ Iоф зэрашIэщт шIыкIэм ны-тыхэр лъэшэу егъэгумэкIых. ЦIыфэу зыкъыт­фэзыгъазэхэрэм яупчIэхэр дистанционнэу ыкIи очнэу депутатхэми, ведомствэ гъэ­нэфагъэхэм яспециалистхэми къафызэхафы. ЗыгъэгумэкIыхэрэ IофыгъохэмкIэ ыпкIэ хэмылъэу цIыфхэм юридическэ IэпыIэгъу араты», — къы­Iуагъ Урысые общественнэ организациеу «Единэ Россием» и НыбжьыкIэ гвардие» и Адыгэ регион къутамэ ипащэу, Мые­къуапэ идепутатэу Бэрзэдж Асыет.