Чъэпыогъум и 1 — 2-м Урысые лъэпкъ премиеу «Илъэсым истудент — 2020» зыфиIорэм ишъолъыр едзыгъо Мыекъопэ къэралыгъо технологическэ университетым щыкIощт. КIэух едзыгъор апшъэрэ еджапIэм иполитехническэ колледж чъэпыогъум и 4-м щызэхащэщт.

Шъолъыр премием изэхэщакIохэр: Мыекъопэ къэралыгъо университетыр, Урысые общественнэ организациеу «Российский Союз молодежи» зыфиIорэм и Адыгэ шъолъыр организацие, Урысые общественнэ движениеу «Ассоциация студентов и студенческих объединений» зыфиIорэм и Адыгэ шъо­лъыр отделение. Iофтхьабзэм изэхэщэнкIэ Адыгэ Республикэм гъэсэныгъэмрэ шIэныгъэмрэкIэ и Министерствэ яIэпыIэгъу.

Проектым имурад шъхьаIэр – лъэныкъо зэфэшъхьафхэу общественнэ IофшIэнымкIэ, наукэмкIэ, творчествэмкIэ, спортымкIэ, ныбжьыкIэ политикэмкIэ, пэрытныгъэмкIэ студентхэм шIушIагъэу яIэр къэгъэлъэгъогъэныр ыкIи ахэм IэпыIэгъу афэхъугъэныр. Гурыт ыкIи апшъэрэ гъэсэныгъэ зыщызэрагъэгъотырэ организациехэм ащеджэхэрэр ыкIи студент объединениехэр (аныбжь илъэс 16 — 25-рэ) мы зэнэкъо­къум хэлэжьэнхэ амал яI. Лъэныкъо 13-кIэ студентхэр къыхагъэщыщтых.

Зэнэкъокъум иапэрэ едзыгъо чъэпыогъум и 1 — 2-м Мыекъопэ къэралыгъо технологическэ университетым иактовэ зал щыкIощт. Мы Iофтхьабзэм епхыгъэ упчIэхэу шъузыгъэгумэкIыхэрэмкIэ проектым ипащэу Бжьэмыхъу Руслъан шъуфытеу: +7(961)9715084-рэ е e-mail: aroaso@mail.ru.

Iэшъынэ Сусан.