ЛэжьапкIэхэм ятын, IофшIэнымкIэ фитыныгъэхэр гъэцэкIэгъэнхэм, хэ­бзэIахьхэмрэ къаугъоихэрэмрэ афэгъэхьыгъэ хэбзэгъэуцугъэр мыу­къогъэным афэгъэзэгъэ Межведомственнэ комиссиеу АР-м щы­зэхащагъэм тыгъуасэ зэхэсыгъо иIагъ. Ащ тхьамэтагъор щызэ­ри­хьагъ АР-м и Премьер-министрэу Геннадий Митрофановым.

Зэхэсыгъом хэлэжьагъэх АР-м IофшIэнымкIэ ыкIи социальнэ хэхъоныгъэмкIэ ими­нистрэу Мырзэ Джанбэч, финансхэмкIэ министрэм игуадзэу Екатерина Косиненкэр, мы лъэ­ныкъохэм афэгъэзэгъэ къулыкъухэм, ведомствэхэм ялIы­кIохэр.

Нахьыбэу зытегущыIагъэхэр хэбзэIахьхэм якъэугъоин епхыгъэ Iофхэр ары. Мы лъэны­къомкIэ законыр зыукъохэрэм афэгъэхьыгъэ тхылъэу хэбзэ­IахьхэмкIэ органхэм къагъэхьы­хэр зэрауплъэкIухэрэм къытегущыIагъ УФ-м и МВД экономическэ щынэгъончъэнымкIэ ыкIи къолъхьэ тын-Iыхыным пэшIуекIогъэнымкIэ и ГъэIоры­шIапIэ иотдел ипащэу Мэрэтыкъо Бислъан.

Ащ къызэриIуагъэмкIэ, блэ­кIыгъэ 2019-рэ илъэсым хэбзэ­IахьхэмкIэ Федеральнэ къулыкъум и ГъэIорышIапIэу АР-м щыIэм зэгъогогъу ащ фэдэ Iоф хэплъэнхэу тхылъхэр къызэрафигъахьыгъэхэр. Ар Тэхъутэмыкъое районым къыщызэIуа­хыгъэгъэ коммерческэ орга­ни­зациехэм ащыщ зыфэгъэхьы­гъэр. ХэбзэIахьхэр ымытыхэу ащ ипащэ сомэ миллиони 5,5-рэ зэIуигъэкIагъ, предприятиер истыхьагъэкIэ макIо. ГъэIоры­шIапIэм уплъэкIунхэр зызэхещэхэм, пащэм ышIэзэ хъызмэт­шIапIэр банкрот ышIыгъэу къы­чIагъэщыгъ ыкIи ащ пае уголовнэ Iоф къызэIуахыгъ.

2020-рэ илъэсэу тызыхэтыр къызихьагъэм къыщыублагъэу хэбзэIахьхэм ятынкIэ законыр аукъуагъэу УФНС-м зыпари тхылъ къафигъахьыгъэп.

— БлэкIыгъэ илъэсым зэгъо­гогъу, мыгъэ зыпари щыIэп. Къулыкъоу мы Iофым фэгъэзагъэхэм яIофшIэн шIуагъэ къытэу зэрэзэхащэрэр, хъызмэтшIапIэхэми япшъэрылъхэр зэрагъэцакIэхэрэр ащ къеушы­хьаты. ТапэкIэ Iофхэр ащ тетынхэу тэгугъэ, — къыIуагъ Премьер-министрэм.

Зэхэсыгъом къызэрэщынэфагъэмкIэ, хъызмэтшIапIэм ипащэу хэбзэIахьхэр ымытызэ сомэ мин 900-м нэсэу зэIузгъэкIа­гъэм уголовнэ Iоф къыфызэIуахынэу законым къыщыдэлъытэгъагъ. Ащ пшъэдэкIыжьэу къыкIэлъыкIорэр предпринимателымкIэ пхъэшащэ зэрэхъурэм къыхэкIыкIэ, чIыфэр сомэ миллиони 2-рэ мин 700-м нагъэсын фитэу ашIыгъ. Ащ шIуигъэкIымэ пхъа­шэу пшъэдэкIыжь зэрихьыщтым Iо хэлъыжьэп.

Геннадий Митрофановым иеплъыкIэ къыриIотыкIызэ, ар агъэфедэнышъ, предпринимательхэм хэбзэIахьхэмкIэ чIыфэр миллионхэм анамыгъэсыным лъыплъэнхэу ащ фэгъэзагъэхэм къариIуагъ.

ХэбзэIахьхэмкIэ Федеральнэ къулыкъум и ГъэIорышIапIэу АР-м щыIэм ипащэ игуадзэу Дэргушъэо Аскэрбый идоклад къызэрэщыхигъэщыгъэмкIэ, хэбзэIахьхэр 6-НДФЛ шIыкIэм тетэу къэзытыхэрэм япчъагъэ, 2018-рэ илъэсым егъэпшагъэмэ, 2019-м 72-кIэ нахьыбэ хъугъэ. ПстэумкIи республикэм итыр 9045-рэ мэхъу. Ащ ишIуагъэкIэ физическэ лицэхэм хэбзэ­Iахьэу къатырэми сомэ миллион 526-рэ хэхъуагъ ыкIи сомэ миллиарди 4-рэ миллион 810-рэ хъугъэ. 2019-рэ илъэсым хэ­бзэIахьэу ахэм къатыгъэр сомэ миллиарди 4-рэ миллион 578-рэ мэхъу.

ГъэIорышIапIэм ипащэ игуа­дзэ къызэриIуагъэмкIэ, хэбзэ­Iахьхэр игъом къэзымытыхэрэм, къытын фаер нахь макIэу къэзгъэлъагъохэрэм якъычIэ­гъэщын фэгъэзэгъэ межведомственнэ комиссиехэу муниципальнэ образованиехэм ащызэхащагъэхэм яшIуагъэ къэкIо. Ар докладчикым пчъагъэхэмкIэ къыушыхьатыжьыгъ.

ЛэжьапкIэхэм ятын епхыгъэ Iофхэми зэхэсыгъом хэлажьэ­хэрэр анэсыгъэх. Хьыкум приставхэм я Федеральнэ къулыкъу и ГъэIорышIапIэу АР-м щыIэм иотделэу хьыкумхэм рахъухьагъэхэм ягъэцэкIэн, чIыфэ зытелъхэм якъэгъотын ыкIи ахэм мылъкоу къаIахырэм иIугъэкIын афэгъэзагъэм ипащэу Алек­сандр Еловенкэм къызэриIуагъэмкIэ, лэжьапкIэмкIэ чIы­фэ зытелъхэм афэгъэхьы-гъэу Iоф 72-рэ 2020-рэ илъэсым иапэрэ мэзих къаIэкIэ­хьагъ. АхъщэкIэ къэплъытэмэ, ар сомэ миллиони 5-рэ мин 31-рэ мэхъу. Аухыгъэу зэфа­шIыжьыгъэр е къагъэуцугъэр 51-рэ.

Нэужым, бэдзэогъу мазэр къызихьагъэм къыщегъэжьагъэу, тызыхэт мазэм нэсэу, Iофи 6 пстэумкIи къаIэкIэхьагъ. Ар со­мэ мин 719-рэ. ЛэжьапкIэхэмкIэ чIыфэ зытелъхэм афэгъэ­хьыгъэ Iофэу зэкIэмкIи аIэкIэлъыгъэм щыщэу 18-р мыухыгъэу къэнагъ. Ар сомэ миллиони 2-рэ мин 801-рэ мэхъу.

ХЪУТ Нэфсэт.