ЕгъэжьапIэр шэнышIу афэхъущт
Адыгэ Республикэм и ЛIышъхьэ ишIухьафтынхэм якъыдэхын фэгъэхьыгъэ зэIукIэгъухэр дзюдомкIэ Мыекъуапэ щызэхащагъэх.
КIэлэцIыкIу спортым изыкъегъэIэтын хэхьэрэ зэнэкъокъоу «Локодзюдо» зыфиIорэм Къэбэртэе-Бэлъкъарымрэ Адыгеимрэ дзюдомкIэ якомандэхэр бэнэпIэ алырэ-гъум щызэIукIагъэх.
Республикэм дзюдомкIэ испорт еджапIэу Кобл Якъубэ ыцIэ зыхьырэм зэнэкъокъур щыкIуагъ. Адыгеим физкультурэмкIэ ыкIи спортымкIэ и Комитет итхьаматэу, зэхэщэкIо купым ипащэу Дэгужъые Мурат зэнэкъокъум хэлажьэхэрэм къафэгушIуагъ. Адыгеим ибэнэпIэ-еджапIэ дунаим цIэрыIо щыхъугъэхэ спортсменхэр зэрэщагъэсагъэхэр М. Дэгужъыем къыIуагъ. КIэлэцIыкIухэр дышъэр къэзыхьыгъэхэм, республикэм ыцIэ спортышхом щызыIэтыгъэхэм акIырыплъыхэзэ, гъэхъагъэхэр ашIынэу къяджагъ.
Къэбэртэе-Бэлъкъарым къикIыгъэ кIэлэцIыкIухэм ятренерэу, спортышхом щыцIэрыIоу Джэданэ Алим спортым ипIуныгъэ мэхьанэ зыкъызэриIэтырэр игущыIэ къыщыхигъэщыгъ.
2007 — 2008-рэ ыкIи 2009 — 2010-рэ илъэсхэм къэхъугъэ кIалэхэр зыхэт командэхэр дзюдомкIэ зэбэныгъэх, нэбгырэ тфырытф хъущтыгъэх. Адыгеим щыщ кIалэхэр агъасэх тренерхэу Мерэм Саидэрэ Хьакурынэ Ларисэрэ.
Зэнэкъокъур гъэшIэгъонэу кIуагъэ. Къэбэртэе-Бэлъкъарым икомандитIуми алырэгъум текIоныгъэр къыщыдахыгъ.
Зэкъош республикэхэр, зэгъунэгъу шъолъырхэр спортым зэфещэх, язэфыщытыкIэхэр зэнэкъокъухэм ащэпытэх. Республикэм испорт псэуалъэхэр нахь зэтегъэпсыхьагъэ хъугъэх, яIэпэIэсэныгъэ кIэлэцIыкIухэмрэ ныбжьыкIэхэмрэ хагъэхъонымкIэ, япсауныгъэ агъэпытэнымкIэ амалышIухэр яIэх.
ЕмтIылъ Нурбый.