2019 — 2020-рэ илъэсхэм Нэшъукъуае хэпшIыкIэу хэхъоныгъэхэр фэхъугъэх.

2020-рэ илъэсым ыпэкIэ фельдшер-мамыку IэзапIэу Нэшъукъуае дэтыгъэм икъу фэдизэу уигъэрэзэнэу щытыгъэп, ау ащ пае къэмынэу, алъэкI къамыгъа­нэу, яIофшIэн фэшъыпкъэхэу щылэжьагъэх УдыкIэко Юныс, КIыкI Сэламэт, УдыкIэко Сарэ, нэмыкIхэри. Нэшъу­къуае фельдшер-мамыку унакIэ щашIыгъ ыкIи ар мыгъэ, гъэтхэпэ мазэм, къызэIуа­хыгъ. Непэрэ мафэхэм ащ иIофшIэн щылъе­гъэкIуатэ Блэгъожъ Розэ. Мы бзылъфы­гъэм ащ ыпэкIи мыщ Iоф щишIэщтыгъ. ЦIыф рэхьат, иIофшIэн хэшIыкI фыриI, къоджэдэсхэр фэразэх.

Урамэу Октябрьскэр Нэшъукъуае идэхьэгъум щегъэжьагъэу идэкIыгъо нэсэу кIоцIырэкIы. Мы урамыр дэхэ дэдэу чэщырэ къэнэфэу ашIыгъ. Къэо­IокIэ, къэотхыкIэ икъурэп, ар плъэгъун фае. Урамым Нэшъукъое еджапIэр, мэщытыр, культурэм и Унэ, тучанхэр тетых. Пчыхьэрэ цIыфхэр нэфынэм хэтхэу зыцIэ къетIуагъэхэм якIолIэнхэ алъэкIы. ЦIыфхэу зызыгъэпсэфыхэрэмкIи урамыр зэрэзэпэнэфыжьырэр лъэшэу гушIуагъу. Автобус инэу, дахэу, хъоо- пщаоу щытыр маршрутэу «Къунчы­къохьабл — Краснодар» тет. ЦIыфхэу Краснодар е нэмыкI чIыпIэхэм ащылажьэхэрэмкIэ, Iофыгъо зэфэшъхьафхэм япхыгъэу къуаджэм дэкIыхэрэмкIэ мы автобусыр лъэшэу Iэрыфэгъоу щыт.

ТапэкIэ маршруткэу тетыгъэр сыхьатыр 17-рэ такъикъ 30-м къалэу Краснодар и ТЭЦ къыIукIыжьыщтыгъэмэ, джы автобусэу тетыр сыхьатыр 18-рэ такъикъ 30-м къыIокIыжьы. Краснодар Iоф щызышIэхэу къыдэкIожьын зылъэ­кIыхэрэр нахьыбэ хъугъэ.

Культурэм и Унэу къоджэ гупчэм итым гъэцэкIэжьын IофшIэнхэр щырекIокIыгъэх.

Щытхъу хэлъэу культурэм и Унэ Iоф щашIагъ КIыкI Исмахьилэ, УдыкIэко Казбек, ЯхъулIэ Налбый, ЯхъулIэ Юныс, КIыкIхэу Къэралхъан, Аслъанбэч, Щамсудин, Щамсэт, Сафиет, Рахьмэт, Хьазрэт, нэмыкIхэми.

Культурэм и Унэ иIофшIэн лъагъэ­кIуатэ непэрэ мафэхэм УдыкIэко Щамсэт, КIыкI Мирэ, Цундышк Зуриет, ЯхъулIэ Махьмудэ. ЗыцIэ къетIуагъэхэм IофшIэнышхо агъэцакIэ: культурэм, искусствэм афэгъэхьыгъэ шIэныгъэхэр цIыфхэм аIэкIалъхьанхэр, заом ыкIи IофшIэным яветеранхэм цIыфхэр аIугъэ­кIэгъэнхэр, зызыщагъэпсэфырэ пчыхьэзэхахьэхэр, диспутхэр, конференциехэр зэхэщэгъэнхэр, кружок зэфэшъхьафхэм яIофшIэн лъыгъэкIотэгъэныр, конкурсхэм ахэлэжьэгъэныр… Культурэм и Унэ иIофышIэхэм япшъэрылъхэр агъэцэкIэнхэмкIэ амалэу яIэр рахьылIэ.

Къоджэ гупчэм автомашинэ гъэуцупIи щашIыгъ.

Мыщ фэдиз IофшIэнэу Нэшъукъуае щырекIокIыгъэм мылъку дэгъу зэрэпэIухьагъэр къыдгурэIо, арышъ, тэри, къоджэдэсхэм, икъу фэдизэу къытфашIагъэр зыфэдизыр зэхэтшIыкIын фае. IофшIэнэу къуаджэм щырекIокIыгъэхэм ахэлэжьагъэхэм «тхьашъуегъэпсэу» ятIо тшIоигъу.

Анахьэу тызыфэразэр Адыгэ Республикэм и ЛIышъхьэу КъумпIыл Мурат ары. Ащ иIофшIэн зэригъэцакIэрэм фэшъхьафэу цIыфхэм заIуе­гъакIэ, ящыIэкIэ-псэукIэ зыфэдэр, зыфэныкъохэр зэрегъашIэ, ахэм афэгъэхьыгъэ IофшIэнхэм ягъэцэкIэн амалэу иIэр рехьылIэ.

«Тхьашъуегъэпсэу ятэIо» Адыгэ Рес­публикэм псауныгъэр къэухъумэгъэнымкIэ, культурэмкIэ министерствэхэм, Теуцожь районым иадминистрацие, Пэнэжьыкъое къоджэ псэупIэм иадминистрацие, Теуцожь район Советым инароднэ депутатхэм, нэмыкI организациехэу зишIуагъэ къэзыгъэкIуагъэхэм. Джащ фэдэу тафэраз Нэшъукъуае щыщ­хэу, е нэмыкI чIыпIэ щыпсэухэу зи- гугъу къэтшIыгъэ IофшIэнхэм ахэлэжьагъэхэм.

КIыкI Вячеслав. -Егъэджэн-пIуныгъэм иветеран.

Нэшъукъуай.