Адыгэ Республикэм культурэмкIэ и Мини­стерствэрэ Адыгэ Республикэм культурэмкIэ икъэралыгъо бюджет учреждениеу «Адыгэ Республикэм лъэпкъ культурэмкIэ и Гуп­чэрэ» Iоныгъом и 27-м къыщегъэжьагъэу Iоныгъом и 29-м нэс адыгэ культурэм и Дунэе фестиваль зэхащэщт.

Адыгэ Республикэм ия 100-рэ илъэс игъэмэфэкIын фэгъэхьыгъэ Iофтхьабзэхэм къадыхэлъытагъэу, Адыгэ Респуб­ликэм икъэралыгъо программэу «Культурэм хэхъоныгъэ егъэшIыгъэныр» зыфиIорэм диштэу ар зэхащэщт.

Коронавирусым хэгъэгуми, Адыгэ Республикэми закъызэращиштагъэм епхыгъэу адыгэ культурэмкIэ Дунэе фестивалыр заочнэу кIощт. Видеороликхэр къызфагъэфедэхэзэ, шапхъэу щыIэхэм адиштэу ар зэхащэщт.

Дунэе фестивалыр чэзыуитIукIэ зэтеутыгъэщт:

а 1-рэ чэзыур — чIыпIэхэм (IэкIыб хэгъэгухэм, Урысые Федерацием ишъо­лъырхэм) 2020-рэ илъэсым шышъхьэIум и 15-м нэс ащыкIуагъ;

я 2-рэ кIэух чэзыур — 2020-рэ илъэ­сым Iоныгъом и 27-м къыщегъэжьагъэу Iоныгъом и 29-м нэс Адыгэ Республикэм щыкIощт.

Хабзэ зэрэхъугъэу, Иорданием, Тыр­куем, Германием, Израиль, нэмыкI къэралыгъохэу адыгэхэр зыщыпсэухэрэм, Урысыем ишъолъырхэм — Къэбэртэе-Бэлъ­къарым, Къэрэщэе-Щэрджэсым, Адыгеим, Темыр Осетием — Аланием, Краснодар краим ятворческэ коллективхэмрэ ахэм арыс нэбгырэ зырыз­хэмрэ фестивалым хэлажьэх.

Профессиональнэ, самодеятельнэ творческэ коллективхэри, нэбгырэ зырызхэри фестивалым хэлэжьэнхэ алъэ­кIыщт. Ахэм аныбжь илъэс 18-м нэсыгъэу е шъхьадэкIыгъэу щытын фае.

«ОрэдкъэIоныр», «Къэшъоныр», «Лъэпкъ Iэмэ-псымэхэм къягъэIогъэныр», «Усэхэм IупкIэу къяджэгъэныр» зыфиIорэ лъэныкъохэмкIэ фестивалым хэла­жьэхэрэр зэнэкъокъущтых.

Ащ хэлажьэхэрэм яIэпэIэсэныгъэ уасэ фэзышIыщтыр Адыгэ Республикэм, Урысые Федерацием ишъолъырхэм, IэкIыб къэралыгъохэм культурэмрэ искусствэмрэкIэ яIофышIэ цIэрыIохэр зыхэтыщт жюрир ары.

IэкIыб къэралыгъохэм, тихэгъэгу ишъолъырхэм арысхэм къагъэлъэгъорэ номерхэр зытет видеороликхэр Инстаграмым — @mincult_ra, @cnkra01.ru зыфиIохэрэм, Facebook, ВКонтакте зыфиIохэрэм, Адыгэ Республикэм лъэпкъ культурэмкIэ и Гупчэ и YouTube- канал къарагъэхьащтых.