Аныбжь нэмысызэ
КIэлэегъаджэхэм аныбжь нэмысызэ пенсием кIонхэу фитыныгъэ яI, ау ащ шэпхъэ гъэнэфагъэхэр пылъых. КIэлэцIыкIухэм апае гъэпсыгъэ учреждением Iутын фае, илъэс IофшIагъэу ащ фэдэ чIыпIэм щыриIэр 25-м къыщыкIэ хъущтэп.
2019-рэ илъэсыр къызихьагъэм къыщыублагъэу пенсием зыщыкIощтхэ ныбжьэу агъэнэфагъэм игъорыгъоу къэралыгъор техьэ. Ар къыдэлъытагъэу кIэлэегъаджэхэми пенсиер афагъэпсы. Ащ ыпкъ къикIэуи илъэс IофшIагъэхэр зыригъэкъугъэм ыуж пенсием зыщыкIощт пIалъэр лъэкIуатэ.
2020-рэ илъэсым пенсием кIонэу фитыныгъэ зиIэ хъурэм илъэсрэ ныкъорэ зытешIэкIэ ар ыгъэпсын ылъэкIыщт. ГущыIэм пае, илъэс IофшIагъэхэр Iоныгъо мазэу тызыхэтым ригъэкъугъэмэ, 2022-м игъэтхэпэ мазэ пенсием кIощт.
Социальнэ кIэлэегъаджэхэм афэгъэхьыгъэу УФ-м и Правительствэ унашъоу ышIыгъэм къызэрэдэлъытагъэмкIэ, ахэм пенсиер нахьыжьэу агъэпсыным пае учреждение гъэнэфагъэм IофшIэгъэ илъэсхэр щырагъэкъугъэнхэ фае. Ахэм ахэлъытагъэх кIэлэцIыкIу ибэхэр е лъыплъэн зимыIэу къэнагъэхэр зыщаIыгъхэр, кIэлэцIыкIоу ихэхъонкIэ ауж къинэхэрэр зычIэсхэр, егъэджэн-пIуныгъэ Iофым фэгъэзэгъэ хэушъхьафыкIыгъэ учреждениеу, зэфэшIыгъэ е зэIухыгъэ шIыкIэм тетэу Iоф зышIэхэрэр, психолого-педагогическэ ыкIи медико-социальнэ IэпыIэгъу зищыкIэгъэ сабыйхэр зыщырагъаджэхэрэр, социальнэ фэIо-фашIэхэр зыгъэцакIэхэрэр.
Социальнэ кIэлэегъаджэу гурыт еджапIэхэм ачIэтхэр ныбжьыр нэмысыгъэу пенсием кIонэу фитыныгъэ зиIэхэм ахахьэхэрэп.
КIэлэегъаджэм илъэс IофшIэгъухэр зыригъэкъукIэ пенсием кIоным зыныбжь екIолIагъэхэми ахалъытэ. ГущыIэм пае, 2020-рэ илъэсым ичъэпыогъу мазэ ригъэкъугъэмэ, ащ лъыпыдзагъэу «предпенсионер» мэхъу.