АР-м и Къэралыгъо Совет — Хасэм я LIV-рэ зэхэсыгъоу тыгъуасэ иIагъэр зыгъэпсэфыгъо уахътэм ыуж апэрагъ.

Анахь шъхьаIэу зытегущыIагъэхэр АР-м и Премьер-министрэ IэнатIэ Геннадий Митрофановыр IугъэхьэгъэнымкIэ, АР-м и УплъэкIокIо-лъытэкIо палатэ ипащэу Павел Стаценкэр гъэнэфэгъэнымкIэ Адыгэ Республикэм и ЛIышъхьэ дегъэштэгъэныр ары. Мыщ фэдэ IэнатIэхэм аIухьащтхэм апае депутатхэм шъэф шIыкIэм тетэу амакъэ атыныр законым къыщыдэлъытагъ. Ащ фэшI ахэм атегущыIэнхэр рамыгъажьэзэ, эпидемиологием ылъэныкъокIэ Iофхэм язытет къыдэлъыта­гъэу, кандидат пэпчъ хэушъхьафыкIыгъэу мэкъэтынхэр афамышIхэу, тIуми зэу афызэхэщэгъэнэу Парламентым и Тхьаматэ игуадзэу Шъэо Аскэр предложение къыхьыгъ. Депутатхэм ащ дырагъэштагъ.

АР-м и ЛIышъхьэ ыцIэкIэ Геннадий Митрофановым икандидатурэ къыгъэлъэ­гъуагъ АР-м и ЛIышъхьэ ыкIи министрэхэм я Кабинет я Администрацие ипащэу Владимир Свеженец. Мы IэнатIэм пшъэрылъэу къыгъэуцухэрэр ыгъэцэкIэнхэу ицыхьэ телъэу ыкIи тефэу ылъытэу республикэм ипащэ ар къызэрэхихыгъэр, дырагъэштэным зэрэщыгугъыхэрэр ащ къыIуагъ.

Нэужым Геннадий Митрофановым гущыIэр зыратым, АР-м и ЛIышъхьэ цыхьэ къызэрэфишIыгъэм пае лъэшэу зэрэфэразэр къыкIигъэтхъыгъ, Iофэу зыфэгъэзэгъэщтым пшъэрылъышхохэр къызэригъэуцухэрэр икъоу къызэрэгурыIорэр, дырагъаштэмэ къызэригъэ­шъыпкъэжьыщтыр къыIуагъ.

Депутатхэм ащыщхэм яеплъыкIэхэр къыраIотыкIыгъэх. Ахэм мы кандидатурэр игъоу алъэгъугъ. Геннадий Митрофановыр социальнэ Iофхэм, финансхэм, экономикэм афэгъэзэгъэ министерствэхэм илъэсыбэрэ зэращылэжьагъэр, экономикэ хэхъоныгъэмкIэ ыкIи сатыумкIэ Министерствэм пэщэныгъэ зэрэдызэрихьагъэр къыхагъэщызэ, лъэныкъо пстэумкIи Iофхэм язытет зэрэщыгъуазэр, ишIэныгъи, иакъыли икъуным яцыхьэ зэрэтелъыр къаIуагъ.

— Правительствэм илъэсыбэрэ ипэщэгъэ КъумпIыл Мурат мы IэнатIэм Iутыгъэу, анахьыбэу шIагъэ зиIэхэм зэращыщыр республикэм щыпсэухэ­рэм ащыгъупшагъэп, — къыIуагъ Парламентым и Тхьаматэ игуадзэу Шъэо Аскэр. — Арышъ, ащ иIофшIэн зэрэзэхищэщтыгъэм, ынаIэ зытетыгъэхэм, зэшIохыгъэу иIагъэхэм непэ техьэрэр зэрэрагъэпшэщтыр сыдигъокIи къыбгурыIон фае. Джащ къыщымыкIэнэу, нахьышIум ылъэныкъокIэ зэхъокIыны­гъэу республикэм фэхъугъэхэм тапэкIи ахэ­хъонэу, Iуагъэм нахьэу шIагъэр нахьыбэнэу цIыфхэр щэгугъых. Джар бгъэцэкIэнэу тэри тыкъыпщэгугъы.

Ащ ыужым АР-м и ЛIышъхьэ ыцIэкIэ Павел Стаценкэм икандидатури Владимир Свеженец къыгъэлъэгъуагъ. МыщкIи депутатхэм яеплъыкIэхэр къаIуагъ. Павел Стаценкэм Парламентым Iоф зэрэщишIагъэр, палатэмкIи цIыфыкIэу зэрэщымытыр къыдалъытэзэ, пэщэ IэнатIэм пшъэ­рылъэу къыгъэуцухэрэр ыгъэцэкIэнхэм яцыхьэ зэрэтелъыр къыхагъэщыгъ.

Ахэм ауж шъэф шIыкIэм тетэу амакъэхэр атыгъэх. Депутат 44-у зэхэсыгъом хэла­жьэхэрэм ащыщэу 43-мэ Геннадий Митрофановыр АР-м и Премьер-министрэ IэнатIэ Iугъэ­хьэгъэнымкIэ ЛIышъхьэм дырагъэштагъ. Павел Стаценкэр АР-м и Уплъэ­кIокIо-лъытэкIо палатэ ипащэу гъэ­нэфэгъэными ащ фэдиз зымакъэ фэзытыгъэр.

Нэужым бюджет IофшIэным фэгъэхьыгъэ республикэ хэбзэгъэуцугъэм зэхъокIыныгъэхэр фэшIыгъэнхэм фэгъэхьыгъэ за­коным ипроект тегущыIэхи апэрэ еджэгъумкIэ аштагъ, 2020-рэ илъэсым иапэрэ мэзих респуб­ликэ бюджетыр гъэцэкIагъэ зэ­рэхъугъэм фэгъэхьыгъэ док­ладэу АР-м финансхэмкIэ иминистрэ игуадзэу Екатерина Косиненкэм къышIыгъэм едэIугъэх.

Урысые Федерацием инэ­мыкI субъектхэм язаконихъухьэ къу­лыкъухэр кIэщакIо зыфэхъугъэ­хэми депутатхэр ахэплъагъэх, адырагъэштагъ.

ХЪУТ Нэфсэт.