Сакъыныгъэ къызхэжъугъаф

Джыбэм иIэбэрэ бзэджашIэхэм студентхэр ыкIи кIэлэеджакIохэр афэсакъынхэу хэбзэухъумакIохэр къяджэх.

Мыщ фэдэ бзэджэшIагъэхэр нахьыбэу зыщы­зэрахьэхэрэр общественнэ транспортыр ары. ИлъэсыкIэ еджэгъур зэрэрагъэжьэжьыгъэм ыкIи мы уахътэм транспортым итIысхьэрэр нахьыбэ зэрэхъурэм дакIоу, зэтыгъохэрэм япчъагъи хэхъо. Арышъ, шъузфэсакъыжь.

Адыгеим иполицие шъугу къегъэкIыжьы:

— унэм шъукъикIы зыхъукIэ непэ шъуищыкIэгъэщт ахъщэр къашъуштэ, осэшхо зиIэ пкъыгъо горэ шъущэфынэу ишъухъухьагъэмэ, банк картэр жъугъэфедэ- мэ нахьышIу; — картэм ипин-код зытетхэгъэ тхьапэр шъуибэхъщалъэ дэшъумыгъэлъ; — тучаным шъучIэтымэ, барсеткэр, Iалъмэкъыр шъуапэкIэ шъуIыгъых; — гъончэджым иджыбэ шъуиахъщэ, мобильнэ телефоныр ыкIи уасэ зиIэ пкъыгъохэр ишъумылъ- хьэх. БзэджашIэм зи римыгъаIоу ахэр рихынхэ ­ылъэкIыщт.

Зыщышъумыгъэгъупш!

Джыбэм иIэбэрэ бзэджашIэхэм нахьыбэрэмкIэ

«Iоф зыщашIэрэр» цIыфыбэ зыщызэрэугъоирэ чIыпIэхэр арых. Общественнэ транспортыр, вокзалхэр, кинотеатрэхэр, тучанхэр, бэдзэрхэр, зэхахьэхэр арых мыщ фэдэ бзэджэшIагъэхэр бэу зыщагъэунэфыхэрэр.

Шъуиджыбэ зэгорэ рахыгъэу щытмэ, апэрэмкIэ гъунэгъоу щыт цIыфхэм зафэжъугъаз, шъуяупчI. Ахэм ащыщхэм бзэджашIэр алъэгъугъэн ыкIи ащ итеплъэ зыфэдэр къаIон алъэкIыщт.

ПсынкIэ Iофэу полицием шъуфытеу, ащ ителефон номерыр 02 (мобильнэмкIэ — 102).

ПшъэдэкIыжь шъуагъэхьыщт

Зыныбжь имыкъугъэхэм шъон пытэ­хэр япщэн узэрэфимытыр хэ­бзэ­ухъумакIохэм шъугу къагъэкIыжьы. МыщкIэ хэбзэгъэуцугъэр зыукъохэрэм пшъэдэкIыжь арагъэхьыщт.

Алкоголь продукциер зыщэфырэм ыныбжь имы­къугъэу тучантесыр зегуцафэкIэ, ащ идокумент къыригъэштэнэу фитыныгъэ иI.

ЩакIохэу законыр зыукъохэрэм административнэ ыкIи уголовнэ пшъэдэкIыжь арагъэхьын алъэкIыщт. Джащ фэдэу ахэм тазыр атыралъхьэ — цIыфхэм сомэ мин 30-м къыщегъэжьагъэу мин 50-м нэс, IэнатIэ зыIыгъхэм — сомэ мини 100-м щыублагъэу 200-м нэс, юридическэ лицэхэм — сомэ мин 300-м щегъэжьагъэу мин 500-м нэс.

Джащ фэдэу, зыныбжь имыкъугъэм шъон пытэр пчъагъэрэ езыщагъэу агъэунэфыгъэм уголовнэ пшъэ­дэкIыжь рагъэхьын алъэкIыщт.

Шъон пытэхэр зыгъэфедэрэ зыныбжь имыкъугъэхэм административнэ пшъэдэкIыжь зэрахьыщтым дакIоу, полицием иотделрэ наркологическэ диспансерымрэ яучет хагъэуцонхэ алъэкIыщт. Ащ епхыгъэ къэбарыр Iэтахъор зычIэс гъэсэныгъэм иучреж­дение лъагъэIэсы.

Гъогогъу 20-м ехъурэ къапкъырахыгъ

ХэбзэухъумакIохэм къызэратырэмкIэ, мы илъэсым иIоныгъо мазэ къы­зи­хьагъэм щыублагъэу хэбзэнчъэу агъэ­зекIорэ наркотикхэр гъогогъу 20-м ехъурэ къапкъырахыгъэх.

Краснодар краим щыпсэурэ илъэс 34-рэ зыныбжь хъулъфыгъэр полицейскэхэм къаубытыгъ. Ащ рес­публикэм икъэлэ шъхьаIэ ичIыпIэ зэфэшъхьафхэм гъэбылъыпIэхэр ащишIыгъагъэх. Джащ фэдэу, ежь къызалъыхъум, зэкIоцIыщыхьэгъэ пакет 30-м ехъу къыпкъырахыгъ. Эксперт-криминалистхэм зэрагъэунэфыгъэмкIэ, ахэм акIоцIылъыгъэр героин ыкIи «метадон». Интернетым иамалхэр къызфигъэфедэзэ наркотикхэр IуигъэкIын гухэлъ иIагъ.

Джащ фэдэу кIэп грамм 20-м ехъу зыгъэбы­лъыщтыгъэ хъулъфыгъэр хэбзэухъумакIохэм къау­бытыгъ. Мыщ фэдэ бзэджэшIагъэхэр Джэджэ районми щызэрахьагъэхэу агъэунэфыгъ. Тэхъутэмыкъое районым щыпсэурэ илъэс 43-рэ зыныбжь хъулъфыгъэм иунэ къызалъыхъум, кIэп грамм шъитф фэдиз къырагъотагъ. Ащ уголовнэ Iоф къыфызэIуахыгъ, лажьэ иIэу хьыкумым зигъэунэфыкIэ, илъэси 10-м нэс хьапс къыхьын ылъэкIыщт.

Хэбзэ­ухъумакIохэм псынкIэу зафэжъугъаз

Общественнэ чIыпIэхэм, урамхэм ащызэрахьэрэ административнэ хэбзэукъоныгъэхэм нахьыбэрэмкIэ рихьылIэхэрэр цIыф къызэрыкIохэр арых.

БзэджэшIагъэ е хэбзэукъоныгъэ зэрахьагъэу шъу­щыгъуазэмэ полицием зыфэжъугъаз. БзэджашIэм итеплъэ шъугу ишъуубыт: ащ илъэгагъэ, щыгъынэу е цуакъэу щыгъыр зыфэдэхэр. ХэбзэухъумакIохэм ар къаубытынымкIэ IэпыIэгъу шъуафэхъун шъулъэкIыщт.

НэкIубгъор зыгъэхьазырыгъэр Тхьаркъохъо Адам.