Хэгъэгу зэошхом ТекIоныгъэр къызыщыдахыгъэр илъэс 75-рэ зэрэхъугъэм тегъэпсы­хьагъэу, дзэ щытхъумрэ шIэжьымрэ я Илъэс къыдыхэлъытагъэу зэгъунэгъу шъолъыр заулэмэ яшыухэр зыхэлэжьэрэ зекIор Iоныгъом и 20-м Адыгеим щырагъэжьагъ.

Республикэм икъушъхьэлъэ чIыпIэхэу зэо пхъашэхэр зыщыкIуагъэхэм, нэмыц-фашистхэр къызыщызэтырагъэуцогъэ Кавказ къушъхьэтх зэпырыкIыпIэхэм якIурэ гъогухэм мэфищэ шыухэр арыкIощтых. «Хьагъэудж куп» зыфиIорэ ансамблэм «Нацдивизием иорэд» къы­Iозэ, шыухэр гъогу техьагъэх.

Адыгеим, Къэбэртэе-Бэлъкъарым, Къэрэщэе-Щэрджэсым, Краснодар краим ялIыкIо адыгэхэри, къэзэкъхэри зекIом хэлажьэх. ПстэумкIи ахэр нэбгырэ 50 фэдиз мэхъух. Ахэр дзэкIолIхэр зыщызэогъэ чIыпIэхэм ащыIэщтых, заом щыфэхыгъэхэм ясаугъэтхэм акIэлъырыхьащтых.

— Обществэу «Шыу Хасэмрэ» общественнэ движениеу «Адыгэ Хасэмрэ» ащ фэдэ Iофтхьабзэм кIэщакIо зэрэфэхъугъэхэр шIушIэ афэсэшIы. Гъогу мафэ техьанхэу сафэлъаIо! — къы­Iуагъ Адыгеим и ЛIышъхьэ.