Пынджыри Iуахыжьы
Адыгеим ичIыгулэжьхэм гъэтхасэхэм яIожьын лъагъэкIуатэ. ПстэумкIи гектар 102657-у мыгъэ халъхьэгъагъэм инахьыбэр Iуахыжьыгъах. АР-м мэкъу-мэщымкIэ и Министерствэ Iоныгъом и 21-м тызэрэщигъэгъозагъэмкIэ, тыгъэгъэзэ гектар 55069-м щыщэу 3900 ныIэп къафэнагъэр. ГурытымкIэ лъытагъэу, зы гектарым центнер 21,3-рэ къырахыжьы. ГъэрекIо джырэ фэдэ уахътэм ар 18,8-рэ зэрэхъущтыгъэр. Тыгъэгъэзэ тонн 108866-рэ къаугъоижьыгъах. Ари блэкIыгъэ илъэсым мыщ фэдэ иуахътэ ебгъапшэмэ, тонн мин 35-м ехъукIэ нахьыб.
КъырахыжьырэмкIэ мызыгъэгум пэрытныгъэр Джэджэ районым ичIыгулэжьхэм аIыгъ. Ахэм тыгъэгъэзэ гектар 14163-у апхъыгъагъэм 13214-р хагъэкIыгъ, центнер 22,2-рэ, ари гурытымкIэ лъытагъэу, къырахы.
Чылапхъэ ашIыщт натрыфыри зэкIэ муниципальнэ образованиехэм ащыIуахыжьы. ПстэумкIи гектар 24352-рэ хъущтыгъ, 8178-р аIожьыгъ. Зы гектарым, гурытымкIэ лъытагъэу, центнер 54,9-рэ къырахы.
БылымIус ашIыщт натрыфыр зыщыхалъхьэгъагъэр Кощхьэблэ, Красногвардейскэ, Джэджэ, Мыекъопэ ыкIи Теуцожь районхэр ары. Гектар 1388-рэ хъущтыгъ, ащ иIожьын аухыгъ.
Соем иIухыжьыни тичIыгулэжьхэм гъунэм рафылIагъ. ПстэумкIи гектар 7081-рэ а культурэм рагъэубытыгъагъ, ащ щыщэу 5457-р аIожьыгъах. ГурытымкIэ лъытагъэу, зы гектарым центнер 20,8-рэ къырахы, тонн 11372-рэ къаугъоижьыгъ.
Мыгъэ Адыгеим пындж гектар 9624-рэ щыхалъхьагъ. ГъэрекIо 8181-рэ яIагъэр. Красногвардейскэ, Тэхъутэмыкъое, Шэуджэн районхэр ары мыщ анахьэу зыщыпылъхэр, Теуцожь райоными макIэу, гектар 231-рэ, щырапхъыгъ. ЗэкIэ муниципальнэ образованиехэм ащ иIожьын ащырагъэжьагъ. Гектар 6492-м 1445-рэ хагъэкIыгъ, гурытымкIэ лъытагъэу, центнер 41,3-рэ къырахы.
Джащ фэдэу хэтэрыкI гектар 218-рэ пстэумкIи мыгъэ Адыгеим щагъэтIысхьэгъагъ. Ар Iуахыжьыгъах. ПстэумкIи тонн 1411-рэ къаугъоижьыгъ. Картошкэ гектар 64-рэ агъэтIысхьэгъагъ, 55,5-р ары лэжьыгъэ къэзытыгъэр. ПстэумкIи тонн 717-рэ къыхахыжьыгъ.
Нашэ, хъырбыдз ыкIи къэбжъые зыгъэтIысхьэгъагъэхэр Джэджэ ыкIи Шэуджэн районхэр ары. ПстэумкIи гектар 522-рэ хъущтыгъэх, тонн 2250-рэ къаугъоижьыгъах.
ЧIыгулэжьхэм гъэтхасэхэм яIухыжьын дакIоу бжыхьасэхэм чIыгухэр афагъэхьазырых, кIымафэр изыхыщт рапсым ипхъэни рагъэжьагъ.
ХЪУТ Нэфсэт.