ЦIыфым банкым чIыфэ къыIихыгъэу, ар аубытыжьын зыхъукIэ, узэ­рэпсэун плъэкIыщт ахъщэ анахь макIэу агъэнэфагъэм фэдиз къыфагъэнэнэу фитыныгъэ етыгъэным фэгъэхьыгъэ законопроектым Урысые политическэ партиеу «Единая Россия» зыфиIорэр кIэщакIо фэхъугъ.

Ащ ифракциеу УФ-м и Къэралыгъо Думэ хэтым ипащэ игуадзэу Андрей Исаевым къы­зэриIуагъэмкIэ, проектыр хьазыр, Правительствэм къадыригъэштэнэу щэгугъых. Ар къо­тэгъу къафэхъумэ, хэбзэихъу­хьэхэр тегущыIэнхэу халъхьащт. Думэм ар щаштэмэ, 2021-рэ илъэсэу къакIорэр къызихьэкIэ кIуачIэ иIэ хъущт.

Законопроектым къызэрэ­щыдэлъытагъэмкIэ, цIыфым банкым чIыфэу къыIихыгъэр фэмытыжьэу, ащ иIоф хьыкIумыр хаплъи приставхэм тхылъхэр аратыгъэхэмэ, узэрэпсэун плъэкIыщт ахъщэ анахь макIэу къэралыгъом щагъэнэфагъэм фэдиз къыфагъэнэнэу фитыныгъэ зэриIэм щагъэгъозэн фае. Нэужым цIыфым исчетэу ахъщэр къызэрагъэнэщтыр приставхэм аIэкIигъэхьащт.

«Единэ Россиер» кIэщакIо зыфэхъугъэ проектым пенсионерхэм, сэкъатныгъэ зиIэхэм ыкIи социальнэу анахь мыухъу­магъэхэм къаIэкIэхьэрэ ахъщэр къэухъумэгъэным изакъоп къы­дэлъытагъэр. Къэралыгъом исо­циальнэ IэпыIэгъу зынэмысырэ предпринимательхэри, ежь­ежьы­рэу IофшIэн къызфэзгъоты­жьыгъэхэри (самозанятые) ащ къыхеубытэх. Ахэм чIыфэ къате­фагъэмэ, ащ пае зэкIэ мылъкоу къаIэкIахьэрэр счетым ра­хынэу приставхэм фитыныгъэ яI.

— Непэ, зэпахырэ узэу дунаир зэлъызыкIугъэм ыпкъ къи­кIыкIэ цIыфхэр къиныгъохэм зыщахэхьэгъэхэ лъэхъаным, партиеу «Единэ Россиер» кIэщакIо зыфэхъугъэр игъо дэдэу зэрэщытыр нафэ, — къыIуагъ АР-м и Къэралыгъо Совет —Хасэм и Тхьаматэ игуадзэу Шъэо Аскэр. — А уахътэр зэ­пстэухэмкIи псынкIагъэп, ау социальнэу мыухъумэгъэ цIыф купэу, зэкIэ аугъоигъэр зыгъэ­кIуагъэхэмкIэ анахьэу къины хъугъэ. Нэбгырабэ IофшIэн ямы­Iэу къэнагъ, бизнесым зэригъэкIокIырэм къыщыкIагъ, чIыфэхэм ахэхьагъэхэр предпринимательхэм къахэкIыгъэх. Арышъ, социальнэу мыухъумагъэхэм ямызакъоу, унэе предпринимательхэри мы законопроектым къызэрэхиубытэхэрэм мэхьанэшхо иI. Ежь-ежьырэу IофшIэн къызфэзгъотыжьыгъэу зязгъэтхыгъэхэм япчъагъи нахьыбэ хъунышъ, ахэри къыхиубытэнхэу тыщэгугъы.

Шъугу къэдгъэкIыжьын, цIыфыр зэрэпсэун ылъэкIыщт ахъ­щэ анахь макIэм фэдиз къэ­гъэнэгъэныр шIокI зимыIэ Iофэу зэрэщытым игугъу зыща­шIыгъэр «Единэ Россием» шы­шъхьэIу мазэм зэхэсыгъоу иIа­гъэр ары. Ащ зытегущыIэхэм ыуж, IофшIэнымкIэ, юстициемкIэ министерствэхэм, хьыкум приставхэм я Федеральнэ къу­лыкъу, профсоюз объединение­хэм ялIыкIохэу, субъектхэм япа­щэхэу хэлэжьагъэхэм законопроектыр игъоу алъытэгъагъ.