Партиеу «Единая Россия» зыфиIорэм ифракциеу УФ-м и Къэра­лыгъо Думэ хэтым ипащэ игуадзэу, IофшIэнымкIэ, социальнэ поли­тикэмкIэ ыкIи ветеранхэм яIофхэмкIэ Комитетым хэтэу Андрей Исаевым къызэриIуагъэмкIэ, бжыхьэ зэхэсыгъохэм анахь шъхьаIэу анаIэ зыщатырагъэтыщтыр къихьащт 2021-рэ илъэсым ибюджет цIыфхэр социальнэу къэухъумэгъэнхэм пэIухьащтым чIыпIэ шъхьаIэ щегъэубытыгъэныр ары.

Финанс тхылъ шъхьаIэм иштэн мызыгъэгум къызэрыкIо зэрэмыхъущтым ащ къы­кIигъэтхъыгъ.

Джащ фэдэу, депутатым къы­зэрэхигъэщыгъэмкIэ, цIыфхэм ящыIакIэ нахьышIум ылъэны­къокIэ зэхъокIыныгъэхэр фэзы­шIыщт Iофтхьабзэхэми кIэщакIо афэхъугъэх. ПэIудзыгъэу Iоф зышIэхэрэм яфитыныгъэхэр къэухъумэгъэнхэм, лэжьэпкIэ анахь макIэу цIыфым къыратырэм зыпари емыIэнэу шIыгъэным, Iэзэгъу уцхэр зэраIэкIа­хьэхэрэ системэр гъэкIэжьы­гъэным афэгъэхьыгъэ гъэтэрэзыжьынхэр IофшIэнымкIэ Кодексым фэшIыгъэнхэр ары ахэр зыфэгъэхьыгъэщтхэр.

Джащ фэдэу цIыфхэм Iоф­шIэпIэ чIыпIэхэр ягъэгъотыгъэн­хэмкIэ къулыкъум иIофшIэни зэхъокIыныгъэхэр фэшIыгъэнхэм, гъэкIэжьыгъэным фыте­гъэпсыхьагъэу «Единэ Россиер кIэщакIо зыфэхъугъэхэри лъагъэкIотэщтых.

— Зэпахырэ узэу дунаир зэлъызыкIугъэм ыпкъ къикIыкIэ, экономикэр чIыпIэ къин ит хъу­гъэ нахь мышIэми, цIыфэу рес­публикэм щыпсэухэрэр социаль­нэу ухъумэгъэнхэм фытегъэ­псыхьэгъэ пстэур къыдэлъытагъэу къэкIощт илъэсымкIэ финансовэ тхылъ шъхьаIэр Парламентым ыштэщт, — къыIуагъ АР-м и Къэралыгъо Совет —Хасэм бюджет, финанс, хэбзэ­Iахь ыкIи экономикэ полити­кэмкIэ, предпринимательствэмкIэ ыкIи IэкIыб экономикэ зэфыщытыкIэхэмкIэ и Комитет ипащэ игуадзэу Шэуджэн Сэфэр. — Бюджет ахъщэр зыпэ­Iухьащтыр АР-м и Правительст­ви, цIыфэу щыпсэухэрэри къы­хэдгъэлажьэхэзэ дгъэнэфэщт. Социальнэ мэхьанэ зиIэ проектхэм япхырыщынкIэ цIыфхэм яшIоигъоныгъэхэр къыдэлъытэгъэнхэр непэ пшъэрылъ шъхьа­Iэу тиIэхэм ащыщ. Республикэм щыпсэухэрэм социальнэ IэпыIэгъу игъом ятыгъэныр депутатхэм яIофшIэн шъхьаIэу зэрэщытыр Адыгеим ипарламентариехэм къагурэIо. Бизнес цIыкIум ыкIи гурытым ащылажьэхэрэм IэпыIэгъу ятыгъэным, хэбзэIахьхэр зытыхэрэм ащыщ куп гъэ­нэфагъэхэм яIофшIэн къэгъэ­псынкIэгъэным афытегъэпсыхьагъэу республикэ закон тштагъэ. Бизнес цIыкIум ыкIи гурытым ялIыкIохэм транспортым пае хэбзэIахьхэр амытынхэу закон щыIэ хъугъэ. Медицинэм иIофы­шIэхэм ахъщэ тедзэхэр афэ­гъэ­кIогъэнхэм фэгъэхьыгъэ уна­шъоу УФ-м и Президентэу Вла­димир Путиным къышIыгъэр гъэцэкIэгъэным пае, бюджетым епхыгъэ хэбзэгъэуцугъэ заули Парламентым ыштагъ.

ХЪУТ Нэфсэт.