«Россети Кубань» зыфиIорэм и Адыгэ къутамэ иIофышIэхэр ГОЭРЛО-м иплан илъэси 100 зэрэхъурэм фэгъэхьыгъэу къушъхьэу Ошъутенэ дэкIоягъэх. Адыгэ Республикэм ыкIи «Россети» зыфиIорэм ябыракъхэр а чIыпIэм щаIэтыгъэх.

Патриотическэ Iофтхьабзэм хэлэжьагъэх Адыгэ электрическэ сетьхэм япроизводственнэ-техническэ къулыкъу ипащэу Тао Мурат, Красногвардейскэ районымкIэ электросетьхэм яинженер шъхьаIэу Заур Сулей­мановыр ыкIи мы хъызмэтыр гъэкIэжьыгъэным ыкIи техническэу зэтегъэпсыхьагъэным иотдел ипащэу Хъуажъ Амирзан.

Къушъхьэу Ошъутенэ илъэ­гагъэ метрэ 2804-рэ мэхъу.

— Компанием ибыракъ тIыгъэу мыщ тыдэкIоенэу джыри гъэмафэм итхъухьагъэу щытыгъ. ХэбзэшIоу предприятием бэшIагъэу иIэхэм мыр ащыщти, ар къэтIэтыжьынэу тыфэягъ. А гухэ­лъыр къыддэхъугъэу сэ­лъы­тэ, — къыIуагъ Тао Мурат.

Еджэныр къызэраухыгъэм тетэу мы кIэлэ ныбжьыкIэхэр Адыгэ электрическэ сетьхэм къэкIуагъэх ыкIи яIофшIэн къы­зэрыкIо сэнэхьатхэмкIэ рагъэ­жьэгъагъ. Мы уахътэм ахэм япшъэрылъхэр шIуагъэ къытэу агъэцакIэх ыкIи спорт Iофтхьабзэхэм чанэу ахэлажьэх. Джы гухэлъышIоу зыдаIыгъыр къушъхьэу Фыщт ышъхьапэ нэсынхэр ары.