Урысыем и Лъэпкъ гвардие и ГъэIорышIапIэу Адыгэ Республикэм щыIэм иIофышIэ ныбжьыкIэ 50-у ясэнэхьаткIэ еджэныр къэзыухыгъэхэм присягэ аштагъ. Тихэгъэгу ф­э­шъыпкъэхэу къызэрагъэгъунэщтым игущыIэхэр мэфэкI Iофтхьабзэм къыщаIуагъэх.

ХэбзэухъумакIохэм ясатыр къыхэуцорэ ныбжьыкIэхэм хэбзэшIоу нахьыжъхэм къагъэнагъэхэр зэрэлъагъэкIотэщтхэм ицыхьэ зэрэтелъыр ипсалъэ щыхигъэунэфыкIыгъ Лъэпкъ гвардием ишъолъыр къулыкъу ипащэу, полицием иполковникэу Иван Гричановым. Ащ къэзэрэугъоигъэхэм закъыфигъэзагъ:

— Лъэпкъ гвардием къулыкъур щыпхьыным фэшI пшъэдэкIыжь, шъыпкъэныгъэ, зэфагъэ пхэлъынхэ ыкIи цIыфхэм лъытэныгъэ афыуиIэн фае. Шъуисэнэхьат фэIэпэIасэ шъухъуным пае шъулъэкI ешъухьылIэнэу щыт. ЦIыфхэм шъуафэлажь, бзэджашIэхэм ащышъуухъумэх. Урысыем и Лъэпкъ гвардие икъулыкъушIэ щытхъуцIэр сыдигъуи чIэшъумын, — къыIуагъ ащ.

Джащ фэдэу, къэзэрэугъоигъэхэм шIуфэс гущыIэхэр къапагъохыгъэх отставкэм щыIэ генерал-лейтенантэу Алексей Хоружинымрэ Лъэпкъ гвардием иветеранхэм я Совет итхьаматэу Павел Шевченкэмрэ.