Адыгэ Республикэм и ЛIышъхьэу КъумпIыл Мурат Мыекъопэ районым ты­гъуасэ щызэхищэгъэ дэкIыгъо зэхэсыгъом зекIо-рекреационнэ паркэу «Даховская поляна» зыфиIорэм игъэпсын епхыгъэ Iофы­гъохэм щытегущыIагъэх. Псэуалъэр зыщашIын агу хэлъ площадкэм респуб­ликэм ипащэ екIолIагъ.

Iофтхьабзэм хэлэжьа­гъэх Адыгеим и Премьер-министрэ ипшъэрылъхэр зыгъэцэкIэрэ Геннадий Митрофановыр, ащ игуадзэу Са­пый Вячеслав, АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевыр, республи­кэм зекIонымрэ курортхэмрэкIэ и Комитет итхьаматэу Къэлэшъэо Инвер, Мыекъопэ районым иад­министрацие ипащэу Олег Топоровыр.

ЫпшъэкIэ зигугъу къэтшIыгъэ псэуалъэм ишIын шъолъырымкIэ мэхьанэшхо зэриIэр ыкIи мы лъэны­къом хэхъоныгъэ ышIынымкIэ республикэм амалышIухэр зэрэIэкIэлъхэр Адыгеим и ЛIышъхьэ хигъэунэфыкIыгъ.

— ШэпхъэшIухэм ади­штэрэ фэIо-фэшIэ закъор зекIохэм афэогъэцакIэкIэ непэ икъурэп, къыздэкIогъэ­хэ шъолъырым пылъ къэба­рыр, Iофтхьабзэу щызэхащэхэрэм ахэм зыщагъэгъуа­зэ ашIоигъу. Ар тэ къыз­фэдгъэфедэн фае. Адыгеим тарихъ ыкIи культурэ бай иI, тыди щызэлъашIэрэ продукциер къыгъэлъэгъон ылъэкIыщт, — къыIуагъ республикэм ипащэ.

Адыгеим и ЛIышъхьэ зэрилъытэрэмкIэ, зекIоным джыри хэхъоныгъэхэр ышIынхэм пае зыми фэмыдэ этнокомплекс гъэпсы­гъэн фае. Ар зыщагъэпсын алъэкIыщт чIыпIэ къагъотынэу муниципалитетымрэ профильнэ Комитетымрэ япащэхэм пшъэрылъ афи­шIыгъагъ.

ЗэрагъэнэфагъэмкIэ, ста­ницэу Дахъом, псыхъоу Шъхьэгуащэ исэмэгу нэпкъ дэжь ар щашIыщт. Гектар 75,43-рэ ыубытыщт.