Адыгеим и ЛIышъхьэ Мыекъопэ районым зэкIом инфраструктурнэ проект инитIум ягъэцэкIэн зэрэлъыкIуатэрэм зыщигъэгъозагъ. Ахэр поселкэу Гъозэ­рыплъэ икIэу Лэгъо-Накъэ екIурэ автомобиль гъогум ишIын ыкIи «Дахъо — Лэгъо-Накъэ» зыфиIорэ гъогум иIахь игъэцэкIэжьын.

Адыгеим и ЛIышъхьэ къызэриIуагъэмкIэ, автомобиль гъогоу «Гъозэрыплъ — Лэгъо-Накъэ» зыфиIорэм ишIын рес­публикэм социальнэ-экономикэ хэ­хъо­ныгъэ ышIыным иунэе программэ хэ­хьагъ. Арышъ, ащ игъэцэкIэн мэхьанэшхо зиIэхэм ащыщ.

— Мы проектыр гъэцэкIагъэ зыхъукIэ транспорт логистикэр зекIохэмкIэ нахь Iэрыфэгъу хъущт, отраслэр инвестициехэмкIэ нахь хъопсагъо хъущт, — къыIуагъ КъумпIыл Мурат.

Министрэу Валерий Картамышевым къызэриIуагъэмкIэ, 2018-рэ илъэсым щыублагъэу проектыр агъэцакIэ. А илъэ­сым гъогу километри 2 ашIыгъагъ, 2019-м километри 4,5-рэ хагъэхъуагъ. Мыгъи а IофшIэныр лъагъэкIуатэ. ЗэкIэмкIи икIы­хьагъэ километрэ 17,2-рэ хъущт.

Джащ фэдэу станицэу Дахъом икIэу Лэгъо-Накъэ екIолIэрэ гъогум игъэцэ­кIэжьын зэрэлъыкIуатэрэм респуб­ликэм ипащэ зыщигъэгъозагъ. 2020-рэ илъэсым ишышъхьэIум IофшIэнхэр ра­гъэжьагъэх, къихьащт илъэсым ыкIэм нэс аухынэу ары.

АР-м и ЛIышъхьэ ипресс-къулыкъу