Iоныгъом и 20-р — мэзым иIофышIэ и Маф
Мэзым иIофышIэхэу, иветеранхэу лъытэныгъэ зыфэтшIыхэрэр!
Мэзым иIофышIэ и МафэкIэ тышъуфэгушIо!
ЧIыопс байныгъэшхоу щыт мэзыр зихъой тихэгъэгукIэ мэзлэжьыным мэхьанэшхо иI, мы отраслэм щылажьэхэрэм лъытэныгъэ ин афашIы. Мэзхэм якъэухъумэнкIэ ахэм пшъэрылъышхо агъэцакIэ, мэз промышленнэ комплексым изегъэушъомбгъун яшъыпкъэу акIуачIэ рахьылIэ, республикэми, Урысыеми яэкономикэ изыкъегъэIэтын яIахь хашIыхьэ.
Адыгеим имэзхэм ащылажьэхэрэр зиIоф хэшIыкIышхо фызиIэхэр, пшъэдэкIыжь зэрахьырэр икъоу къызгурыIохэрэр ары. Мафэ къэс ахэр яIофшIэн зэрегугъухэрэм ишIуагъэкIэ мэзхэр зэтегъэуцожьыгъэнхэм, республикэм имэз байныгъэхэр акъылыгъэ хэлъэу гъэфедэгъэнхэм, мэз индустрием республикэм иэкономикэ чIыпIэу щиубытырэм хэгъэхъогъэным япхыгъэ Iофыгъохэр гъэхъагъэ хэлъэу зэшIохыгъэ мэхъух.
Адыгеим имэзлэжьхэм опыт байрэ шIэныгъэ куурэ зэряIэм, теубытагъэрэ гуетыныгъэрэ зэрахэлъым къахэкIэу япшъэрылъхэр тапэкIи гъэхъагъэ хэлъэу зэрагъэцэкIэщтхэм, республикэми, Урысыеми яхэхъоныгъэ яIахьышIу зэрэхашIыхьащтым тицыхьэ телъ.
Ныбджэгъу лъапIэхэр, псауныгъэ пытэ, щыIэкIэ-псэукIэ дэгъу шъуиIэнэу, Адыгейми, Урысыеми апае шъуиIофшIэн гъэхъэгъакIэхэр щышъушIынэу тышъуфэлъаIо!
Адыгэ Республикэм и ЛIышъхьэу, Урысые политикэ партиеу «Единэ Россием» и Адыгэ регион къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожный