КъБР-м и цIыхубэ усакIуэ, РСФСР-м и Къэрал сау­гъэтым и лауреат, Социалист Лэжьыгъэм и ЛIыхъужь КIыщокъуэ Алим.

КIЫЩОКЪУЭ Алим и усыгъэхэм, и роман гъуэзэджэхэм яубзыхуащ зауэ нэужь илъэсхэм гъуэгуанэщIэ техьа къэбэрдей литературэм и хэкIыпIэ нэхъыщхьэхэмрэ и унэтIыпIэхэмрэ. Нобэрей ди литературэм и лъэпкъ фащэхэр, абы къыщIэлъ гъуэгуанэм и гъэзапIэхэр зыубзыхуар КIыщокъуэ Алимщ. ДэркIэ фIыгъуэ мылъытэщ Алим къызэринэкIа дэтхэнэ тхыгъэри — ахэр гъэнщIащ гупсысэр зыгъэлажьэ, гъащIэмрэ зэманымрэ я куупIэр зи лъабжьэ псалъэмакъкIэ. Тхыдэр игъэбатэми, нобэрей дунейм и шыфэлIыфэр, и зэхэлъыпIэхэр, и унэтIыпIэхэр игъэнахуэми, Алим и къалэмым цIыхум и гущIэ-лъапсэм дрегъаплъэ, абы и фэм дэкIымрэ и гум щыщIэмрэ ди пащхьэ кърелъхьэ.

Алим и тхыгъэхэращ къэбэрдей литературэм и цIэр къэралым, дуней псом щызыгъэIуар. Ди литературэр зи лъабжьэр куу, зи пщIэр лъагэ художественнэ хъугъуэфIыгъуэ хъуа­мэ, ар, псом япэрауэ, зи фIыщIэр КIыщокъуэрщ.

Алим и цIэр зэи щыгъупщэнукъым адыгэм — апхуэдэ цIыхур уахътыншэщ. Ди лъэпкъым ар хуэу­псащ нэр темыпыIэу зызыужь XX лIэщIыгъуэ хьэлъэм и гупсысэ жанхэмкIэ гъэнщIа, зэманым ди пащхьэ къригъэувэ упщIэхэм я нэхъ гугъуми жэуап зыщагъуэт тхыгъэ телъыджэхэмкIэ.

КIыщокъуэ Алим пщIэшхуэ зиIа, цIыхугъэ лъагэрэ лIыгъэ мыкIуэщIыжрэ зыхэлъа цIыхуу щытащ. Сыт хуэдэ IэнатIэ бгъэ­дэувэми, ар псоми къахэщырт и гуащIэр зэрыинымкIэ, зэ­рыцIыху пэжымкIэ — абыкIэ щапхъэт Алим дапщэщи.

Къэралым хуэфащэ пщIэ къы­хуищIащ адыгэ тхакIуэ, уса­кIуэ щэджащэм и гуа-щIэдэкIым — Алим къыфIащащ Социалист Лэжьыгъэм и ЛIыхъужь цIэ лъапIэр, РСФСР-м и Къэрал саугъэтыр къратащ, Къэбэрдей-Балъкъэрым и цIыхубэ усакIуэ цIэ лъапIэр зэрихьащ.

ХЬЭФIЫЦIЭ Мухьэмэд.