Шъолъыр фестиваль-зэнэкъокъоу «Адыгэ къуай» зыфиIоу илъэс къэс республикэм щызэхащэрэр мыгъэ коронавирусым зызэриу­шъом­б­гъу­рэм къыхэкIыкIэ зыщашIыщт мафэм ыкIи шIыкIэм зэхъокIы­ныгъэхэр афашIыгъэх.

Шъугу къэдгъэкIыжьын, цIыфыбэ зэрэмыугъоинхэм фэшI 2020-рэ илъэсым мыр фестивалэу щытыщтэп, гастрономическэ Iофтхьабзэ фэдэу мэфэ заулэрэ рагъэкIокIыщт.

Адыгэ къуаем итхьамафэ Iоныгъом и 28-м къыщегъэ­жьагъэу чъэпыогъум и 4-м нэс Iудзыгъэ шIыкIэм тетэу со­циальнэ хъытыухэм ыкIи къэбар жъугъэм иамалхэм къа­щагъэлъэгъощт.

Республикэ общественнэ организациеу «Туристическая Адыгея» зыфиIорэм (Iофтхьа­бзэм изэхэщакIу) хэтэу, фестивалым икоординаторэу Ольга Ивановам порталэу Юга.ру къы­зэрэриIуагъэмкIэ, офлайн Iахьыр зекIо комплекс заулэмэ ягупчэхэм ащызэхащэщт.

— Илъэси 10-м къыкIоцI адыгэ къуаем ифестиваль къу­шъхьэтх чIэгъым щыкIуагъ. Гъэ­хъунэм машIор щашIыти, щыуанышхохэм щэ къэщыгъакIэр арытэу къоеихыныр аублэщтыгъэ. Ау цIыфымкIэ анахь лъапIэу псауныгъэм щынагъо къызыщышъхьарыхьэгъэ 2020-рэ илъэсым тыхэхьагъ. Къоеихыным фэIэпэIасэхэм къы­зэраIорэмкIэ, къуаем псауныгъэм ишIуагъэ екIы. Арышъ, фестивалым изэхэщэн щыд­гъэ­зыягъэп, шIыкIакIэхэр къы­фэд­гъотыгъэх, — къыIуагъ Ольга Ивановам.

Iудзыгъэ шIыкIэм тет зэнэ­къокъур Iоныгъом и 28-м ра­гъажьэ. Ащ хэлэжьэщтхэм адыгэ къое шъыпкъэ тучаным къыщащэфынышъ е ежь-ежьырэу ашIынышъ, социальнэ хъытыум щыряIэ нэкIубгъом къырагъэхьан фае. Джащ фэдэу, адыгэ къуаем итарихъ, ар зэрашIырэм икъэбархэр интер­нетым щатIупщыщтых.

Iоныгъом и 29-м — адыгэ къуаем хэшIыкIыгъэ пчэдыжьы­шхэ е пчыхьэшъхьашхэ гъо­мылапхъэ аупщэрыхьанышъ, исурэт социальнэ хъытыум къы­ра­гъэуцощт. Адыгэ къуаем шIуа­­гъэу пылъыр зэкIэ а сюжет техыгъэм къыщыраIотыкIын фае.

Iоныгъом и 30-р — джырэ ресторан пщэрыхьапIэм адыгэ къуаер зэрэщагъэфедэрэм фэгъэхьыгъэщт. Адыгэ къуаем хэшIыкIыгъэр зыми фэмыдэу, гъэшIэгъонэу, дахэу къагъэ­хьазырыщт.

ЯплIэнэрэ мафэр — «Адыгэ къуаер зыгъэпсэфыпIэм зыз­дэпхьыкIэ». Зэнэкъокъум хэла­жьэхэрэм Адыгеим ит турист объектэу адыгэ къуаер зыща­шхы­мэ ашIоигъор къыхахын фае.

Ятфэнэрэ мафэр — адыгэ къуаер зыдэлъ шхыныгъохэр гъэжъэгъэнхэр. Сурэтхэр интернетым рагъэхьащтых. — ЗэкIэ материалхэу ин­стаграмым къырагъэхьащтхэр тамыгъэу «НЕфестиваль адыгейского сыра-2020» зыфиIорэмкIэ жъугъотыщтых. Нэ­рылъэгъу Iахьэу къагъэлъэгъощтхэм чъэпыогъум и 2 — 4-м шъуяплъын шъулъэкIыщт, — къыIуагъ Ольга Ивановам.

Ащ фэдэ площадки 6 къа­щызэIуахыщт поселкэу Каменномостскэм дэт зыгъэпсэфыпIэхэу «Горная», «Горное настроение» ыкIи «Горная де­ревня», хьакIэщ унэу «Терем у реки», IэзапIэу «Лэгъо-Накъ» (къутырэу Красный Мост), станицэу Дахъом дэт зекIо комплексэу «Графская поляна» зыфиIохэрэм.

Эпидемием пэшIуекIорэ гъунапкъэхэр къыщыдыхэлъыта­гъэхэу ыпшъэкIэ зигугъу къэтшIыгъэ чIыпIэхэм фестиваль площадкэ цIыкIухэр чъэпыогъум и 2-м сыхьатыр 18.00-м къыщегъэжьагъэу чъэпыогъум и 4-м сыхьатыр 14.00-м нэс къащызэIуахыщтых. Къоеихыныр зи­кIасэхэр, ар зыдэлъ шхыныгъо­хэр зыгъажъэхэрэр, творческэ купхэр хэлэжьэщтых.

Мыщ цIыфыбэ щызэхагъэхьащтэп, ау мы уахътэм комплекс­хэм защызгъэпсэфыхэрэм а пстэури зэрагъэлъэгъун амал яIэщт.

Iэшъынэ Сусан.