Зигъот макIэхэм апай
Лъэпкъ проектэу «Демография» зыфиIорэм къыдыхэлъытагъэу Адыгэ Республикэм ис унагъоу зигъот макIэхэм анахьэу ящыкIагъэхэр, гъомылапхъэхэр, Iэзэгъу уцхэр, унэр рагъэфэбэнэу пхъэ, щыгъынхэр къыращэфынхэу зэтыгъо ахъщэ IэпыIэгъу афагъакIо. Ар республикэ бюджетыр ары къызхэхыгъэр.
IэпыIэгъур зытырэр IофшIэнымкIэ ыкIи цIыфхэр социальнэу къэухъумэгъэнхэмкIэ Гупчэр, ащ икъутамэу республикэм ирайон пэпчъ къыщызэIуахыгъэхэр ары.
АР-м IофшIэнымкIэ ыкIи социальнэ хэхъоныгъэмкIэ и Министерствэ къызэрэщаIуагъэмкIэ, тызыхэт илъэсым имэзий пштэмэ, пстэумкIи унэгъо 4000-мэ адеIагъэх. Ащ сомэ миллион 13-рэ мин 21,5-рэ пэIуагъэхьагъ.