УФ-м и Къэралыгъо Думэ Iоныгъом и 15-м зэхэсыгъоу иIагъэм IэкIыб къэрал компаниеу Урысыем Iоф щызышIэхэрэм хэбзэIахьхэр зэратырэ шапхъэхэм афэгъэхьыгъэ гъэтэрэзыжьынэу хэбзэIахьхэмкIэ Кодексым фашIыщтхэр апэрэ еджэгъумкIэ щаштагъэх.

Шъугу къэдгъэкIыжьын, IэкIыб къэрал компаниеу Урысыем ихэбзэIахь къулыкъухэр зылъы­плъэхэрэм хэбзэIахьхэр зэ­ратыщтхэ шапхъэхэр 2014-рэ илъэсыр ары Кодексым зыхагъэхьажьыгъагъэхэр. Ахэм хэ­бзэIахьхэмкIэ законыр амыу­къоным ыкIи экономикэм хэ­хъоныгъэ езгъэшIыщт мылъкур IэкIыбым мыкIоным пае аущтэу зыкIашIыгъагъэр. Бизнесым иягъэ езгъэкIырэ щыкIагъэу мы шапхъэхэм яIэхэр илъэсихым къэлъэгъуагъ.

Ахэр дэгъэзыжьыгъэнхэм фэшI ыкIи къэралыгъом ибизнес нэкъокъогъухэм апэшIуекIо­шъунэу щытыным пае депутатхэу Андрей Макаровым, Леонид Симановскэм, Владислав Резник (УФ-м и Къэралыгъо Думэ АдыгеимкIэ идепутат), Глеб Хор ыкIи Александр Ремезковым, экспертхэм ыкIи бизнес объединениехэм Iофэу адашIагъэм къыпкъырыкIыхэзэ, хэбзэIахьхэмкIэ Кодексым зэхъокIыныгъэу фэшIыгъэн фаехэр къагъэ­хьазырыгъэх. УФ-м и Правительствэ ахэм адыригъэштагъ, анаIэ зытырагъэтын фаеу ащ къыгъэнэфагъэхэр законопроектым къыщыдэлъытэгъэщтых.

— Илъэс пчъагъэм бизнесым пылъхэм Iофэу адэтшIагъэм ыкIи шапхъэхэр щыIэныгъэм щыпхырыщыгъэ зэрэхъурэм тызэрэлъыплъагъэм мы законопроектыр къакIэкIуагъ. IэкIыб къэрал компаниехэм УФ-м хэбзэIахьхэмкIэ и Кодекс зэрагъэцакIэ­рэм фэгъэхьыгъэ упчIабэ бизнесым иIагъ. ГущыIэм пае, ор­ганизацием икъутамэу къызэIуихыхэрэм мылъкоу хилъхьэ­рэм ылъэныкъокIэ фитыныгъэу иIэхэм ягъэфедэн епхыгъэ Iоф­хэр икъоу гъэнэфэгъагъэхэп. А щыкIагъэр дэгъэзыжьыгъэнэу, шапхъэхэр зэхэугуфыкIыгъэу хэбзэгъэуцугъэм къыщыIогъэнхэу предложение къэтхьыгъ. Инвесторым хахъоу иIэм къы­хэхыгъэ хэбзэIахьэу ытырэм ылъэныкъокIи гъэтэрэзыжьынхэм кIэщакIо тафэхъугъ. Псэо­лъэшIхэм яIофшIэн шэпхъакIэу къыхэхьагъэхэм адиштэрэ гъэтэрэзыжьынхэр хэбзэIахьхэмкIэ Кодексым фэшIыгъэнхэми мэхьанэшхо иI. Гъэтэрэзыжьынхэм ащыщхэр компаниер зые къэралыгъоми, Iоф зыщишIэрэми хэбзэIахьхэр ащитынхэм фэгъэхьыгъэх. Анахьэу къыхэз­гъэщы сшIоигъор къэралыгъом мылъкур зэрикIыщтыр нахь гъэпсынкIэгъэн гухэлъ зэрэтимыIэр ары. Хэбзэгъэуцугъэхэм зэпстэури зэхэугуфыкIыгъэу ащыгъэнэфэгъэныр, шапхъэхэр шъхьадж зэрэфаеу ымы­гъэфедэшъунэу шIыгъэныр ары тызыфаер, — къыIуагъ Вла­дислав Резник.