2020-рэ илъэсым иапэрэ илъэсныкъо Адыгеим соци­а­льнэ-экономикэ хэхъоныгъэу ышIыгъэхэм язэфэхьысыжьхэр ашIыгъэх.

АР-м экономикэ хэхъоныгъэмкIэ ыкIи сатыумкIэ и Министерствэ къызэритыгъэмкIэ, промышленнэ къыдэгъэкIыным ииндекс хэхъоныгъэшIухэр ышIыгъэх ыкIи 2019-рэ илъэсым имэзих егъэпшагъэмэ проценти 108,8-рэ мэхъу.

Ащ дакIоу псэолъэшIыным, зекIон индустрием, потребительскэ бэдзэрым алъэныкъокIэ къэгъэлъэнгъохэр къеIыхыгъэх. ЦIыфхэм яхахъохэр нахь макIэ зэрэхъугъэм ыкIи пандемием илъэхъан псэуалъэхэм ащыщхэр зэрэзэфашIы­гъэхэм къыхэкIыкIэ розничнэ сатыушIыныр проценти 5,1-кIэ къеIыхыгъ.

ЗекIоным епхыгъэ IофшIэныр 2020-рэ илъэсым иапэрэ мэзищ ныIэп загъэцэкIагъэр. Ащ къыхэкIыкIэ зекIохэм япчъагъэ фэди 2,4-кIэ нахь макIэ хъугъэ.

— Экономикэм илъэныкъо зырыз­хэмкIэ къэгъэлъэгъонхэр къеIыхы­гъэх. АщкIэ зиягъэ къэкIуагъэр коронавирусым къыздихьыгъэ гумэкIыгъо­хэр ары. Отраслэ пэпчъ Iофхэм язытет зэхэфыгъэным ыкIи ащ къы­дыхэлъытагъэу экономикэм хэ­хъо­ныгъэ ышIыным тынаIэ тедгъэтын фае, — къыIуагъ Адыгеим и ЛIышъхьэу КъумпIыл Мурат.

Мы илъэсым телъытагъэу инвестициехэмкIэ IофшIэным мылъкоу халъхьащтым къыщыкIэщтэу ары пэшIорыгъэшъэу зэрегупшысэхэрэр. Ащ ушъхьагъу шъхьаIэу фэхъухэрэм ащыщ предприятиехэм заушъомбгъунымкIэ ыкIи кIэу ашIынхэмкIэ энергокIуачIэхэм зэращыкIэхэрэр. Мы гумэкIыгъор дэгъэзыжьыгъэным пае республикэм чанэу Iоф адешIэ Урысыем энергетикэмкIэ и Министерствэ, пэрытныгъэ зыIыгъ компаниехэм.

Пандемием илъэхъан экономикэм ыкIи цIыфхэм IэпыIэгъу афэхъугъэнымкIэ къэралыгъом ипащэхэм унашъоу ашIыгъэхэм яшIогъэшхо къэкIуагъ. Ащ епхыгъэ IофшIэныр республикэм зэрифэшъуашэу щызэхащагъ.