Урысыем и Банк ифедеральнэ проектэу «Онлайн-уроки финансовой грамотности» зыфиIорэр Iоныгъом и 16-м къызэIуахыгъ. Адыгеим ит гъэсэныгъэм иучреждениехэр ащ хэлажьэх.

Гурыт ыкIи гурыт хэушъхьафыкIыгъэ еджапIэхэм ачIэсхэм мы программэр ателъытагъ. Егъэджэнхэр мэзи 3 кIощт. Интернет зычIэщагъэхэу, компьютерым кIэрысыр къыгъэлъа­гъоу, къыIорэр зыщызэхахырэ еджапIэхэр проектым хэлэжьэнхэ алъэкIыщт.

Финанс шIэныгъэм епхыгъэ егъэджэгъу сыхьатхэу мы илъэ­сым игъатхэ щыIагъэхэм къызэрагъэлъэгъуагъэмкIэ, респуб­ликэм ит гурыт еджапIэхэм япроцент 40-р ащ хэлэжьагъ. Ащ дакIоу, сэнэхьат зыщызэрагъэгъотырэ учреждениехэу Iоф­тхьабзэм хэлэжьагъэхэм ябгъап­шэмэ, УрысыемкIэ Адыгеим я 14-рэ, Къыблэ федеральнэ шъолъырымкIэ — а 1-рэ чIыпIэр ыубытыгъ.

— Финанс шIэныгъэмкIэ егъэджэгъу сыхьатхэр хабзэ зэрэхъугъэу, илъэс зэкIэлъыкIохэм зэхэтэщэх ыкIи шIуагъэ къаты. Iудзыгъэ шIыкIэм зэрэтетыгъэм емылъытыгъэу, гъатхэм щыIэгъэ егъэджэнхэр дэгъоу рекIокIыгъэх. А уахътэм республикэм икIэлэеджэ­кIо мини 6 фэдизыр Урысыем и Банк ипроект къыхэлэжьагъэх. Анахьэу къахэщыгъэхэр Адыгэкъалэ, Кощхьэблэ ыкIи Теуцожь районхэм ягу­рыт еджапIэхэр, Мыекъуапэ, Джэджэ ыкIи Красногвардейскэ районхэм яколледжхэр ары. Мы бжыхьи а Iудзыгъэ егъэджэгъу сыхьатхэм тиныбжьыкIэхэр хэлэжьэнхэ амал яI, — къыIуагъ Урысые Федерацием и Гупчэ Банк и Къыблэ гъэIорышIэпIэ шъхьаIэ АР-мкIэ Лъэпкъ банкым и Къутамэ ипащэу Сергей Самойленкэм.

Урысыем и Банк гъэсэны­гъэмкIэ ипроект зызэхищэрэр илъэси 4 хъугъэ. Экономикэ хъугъэ-шIагъэхэм яIофыгъохэр бзэ къызэрыкIокIэ экспертхэм къаIуатэ. Кредитхэм, страхованием, нэпцIыкIэ ахъщэ аIызыхырэ бзэджашIэхэм зызэра­щыуухъумэщтым афэгъэхьыгъэ те­мэхэр еджакIохэм нахь ашIо­гъэшIэгъоных. Ащ нэмыкI упчIэу ахэм къатыхэрэм ащыщых мылъкур зэрагъэIорышIэщтыр, бизнес зэрашIыщтыр ыкIи финанс амалэу щыIэхэр зэрагъэфедэщтхэр.

Iэшъынэ Сусан.