Гъэтхасэхэр Iуахыжьых, бжыхьасэхэр агъэхьазырых
Медицинэ организациехэм ящыкIэгъэ компьютернэ оборудование зэфэшъхьафхэу Адыгэ Республикэм псауныгъэр къэухъумэгъэнымкIэ и Министерствэ къыщэфыгъэхэм сомэ миллиони 144,8-рэ атефагъ.
Адыгеим ичIыгулэжьхэм гъэтхасэхэм яIожьын лъагъэкIуатэ. НахьыпэкIэ къызэрэтIогъагъэу, пстэумкIи гектар 102657-рэ мыгъэ ар хъущтыгъ.
Инахьыбэр, 55069-р, тыгъэгъазэм рагъэубытыгъагъ. АР-м мэкъу-мэщымкIэ и Министерствэ Iоныгъом и 16-м тызэрэщигъэгъозагъэмкIэ, ащ инахьыбэр, 44879-р, аIожьыгъах. ГурытымкIэ лъытагъэу, зы гектарым центнер 21,2-рэ къырахыжьы, тонн 94991-рэ къаугъоижьыгъ. АщкIэ пэрытныгъэр Шэуджэн районым ичIыгулэжьхэр ары зыIыгъыр. Тыгъэгъэзэ гектар 10115-рэ апхъыгъагъ, центнер 22-рэ, ари гурытымкIэ лъытагъэу, къырахы.
Чылапхъэ ашIыщт натрыфым иIожьын Джэджэ, Кощхьэблэ ыкIи Шэуджэн районхэр ары зыщырагъэжьагъэр. ПстэумкIи гектар 24352-рэ республикэм щапхъыгъагъ, 2130-р Iуахыжьыгъ. Муниципальнэ образованиищым ячIыгулэжьхэм зы гектарым, гурытымкIэ лъытагъэу, центнер 50 къырахы.
БылымIус ашIыщт натрыфыр зыщыхалъхьэгъагъэр Кощхьэблэ, Красногвардейскэ, Джэджэ, Мыекъопэ ыкIи Теуцожь районхэр ары. Гектар 1388-рэ хъущтыгъэ, ащ иIожьын, ом ымыгъэохъухэмэ, непэ аухыщт.
Соем пстэумкIи гектар 7081-рэ республикэм щырагъэубытыгъагъ. Ащ щыщэу 4632-р ары Iуахыжьыгъэр. ГурытымкIэ лъытагъэу, центнер 21,1-рэ къырахы.
Мыгъэ Адыгеим пындж гектар 9624-рэ щыхалъхьагъ. Красногвардейскэ, Тэхъутэмыкъое, Шэуджэн районхэр ары мы культурэм анахьэу зыщыпылъхэр, Теуцожь райоными макIэу, гектар 231-рэ, щырапхъыгъ. Тэхъутэмыкъое районым ипынджлэжьхэм ащ иIухыжьын рагъэжьагъ. Гектар 6492-м 464-рэ хагъэкIыгъ, гурытымкIэ лъытагъэу, центнер 41,7-рэ къырахы.
Джащ фэдэу хэтэрыкI гектар 218-рэ пстэумкIи мыгъэ Адыгеим щагъэтIысхьэгъагъ. Ар Iуахыжьыгъах. ПстэумкIи тонн 1411-рэ къаугъоижьыгъ. Картоф гектар 64-рэ агъэтIысхьэгъагъ, 55,5-р ары лэжьыгъэ къэзытыгъэр. ПстэумкIи тонн 717-рэ къыхахыжьыгъ.
Нашэ, хъырбыдз ыкIи къэбжъые зыгъэтIысхьэгъагъэхэр Джэджэ ыкIи Шэуджэн районхэр ары. ПстэумкIи гектар 522-рэ хъущтыгъэх, тонн 2250-рэ къаугъоижьыгъах.
ЧIыгулэжьхэм гъэтхасэхэм яIухыжьын дакIоу бжыхьасэхэм чIыгухэр афагъэхьазырых, кIымафэр изыхыщт рапсым ипхъэни рагъэжьагъ.
ХЪУТ Нэфсэт.