Уголовнэ Iоф къызэIуахыгъ

Урысыем хэгъэгу кIоцI IофхэмкIэ и Министерствэ Тэхъутэмыкъое районымкIэ иотдел наркотикхэр хэбзэнчъэу къырамыгъэкIокIынхэм лъыплъэрэ иподразделение икъулыкъушIэхэм зэхащэгъэ уплъэкIун Iофтхьабзэхэм яшIуагъэкIэ мы муниципалитетым щыпсэурэ илъэс 43-рэ зыныбжь хъулъфыгъэм иунэ наркотикхэр къырагъотагъэх.

Следовательхэм ыкIи экспертхэм псэупIэр къалъы­хъузэ, зэкIоцIыщыхьэгъэ пкъыгъуищ зыщыгъэбылъыгъэ чIыпIэ къыхагъэщыгъ. Эксперт-криминалистхэм зэрагъэунэфыгъэмкIэ, хъулъфыгъэм иунэ къырагъотагъэр кIэп, ар грамм 500 хъущтыгъэ.

Экспертизэм изэфэхьысыжьхэм ыкIи аугъоигъэ материалхэм къапкъырыкIыхэзэ илъэс 43-рэ зы­ныбжь хъулъфыгъэм ылъэныкъокIэ хэбзэухъумакIохэм уголовнэ Iоф къызэIуахыгъ. Ащ лажьэ иIэу загъэунэфыкIэ илъэси 10-м нэс хьапс къыхьын ылъэкIыщт.

Хъулъфыгъэр аубытыгъ, нэмыкI бзэджэшIагъэхэм ахэщагъэмэ джырэ уахътэм ауплъэкIу.

ГъогурыкIоныр щынэ­гъончъэным пай

Федеральнэ программэу «ГъогурыкIоныр щынэгъончъэныр» зыфиIорэм къыдыхэлъытагъэу гъогум ущызекIон зэрэфаем фэгъэхьыгъэ Iофтхьабзэхэр полицием икъулыкъушIэхэм Адыгэкъалэ щырагъэкIокIыгъэх.

Адыгэкъалэ имежрайон сымэджэщ щызэхащэгъэ программэм ны ныбжьыкIэхэр ыкIи сабый къызфэ­хъунэу ежэхэрэр хэлэжьагъэх. КIэлэцIыкIур щынэ­гъончъэу къызэрепщэкIын плъэкIыщтыр, ащ фыте­гъэпсыхьэгъэ шапхъэхэр бгъэцэкIэнхэ зэрэфаер ахэм къафаIотагъэх.

Джащ фэдэу гъогум тет водительхэми гущыIэгъу афэхъугъэх, псынкIащэу земычъэнхэм, лъэсрыкIо зэпырыкIыпIэхэм адэжь къыщыуцунхэм мэхьанэшхо зэряIэр агу къагъэкIыжьыгъ. ЕджапIэхэм ачIэс кIэлэеджакIохэми зэIукIэгъу-зэдэгущыIэгъухэр адыряIагъэх.

Iофтхьабзэм иятIонэрэ едзыгъо макIо

Зыныбжь имыкъугъэхэм алъэныкъокIэ бзэджэшIагъэхэр зэрамыхьанхэм, ахэм яфитыныгъэхэр ыкIи яшIоигъоныгъэхэр къэухъумэгъэнхэм фытегъэпсыхьэгъэ оперативнэ-пэшIорыгъэшъ Iофтхьабзэу «Iэтахъу — еджапIэ» зыфиIорэм иятIонэрэ едзыгъо макIо.

ХэбзэухъумакIохэм ягъусэхэу Iофтхьабзэм хэлажьэх АР-м хэгъэгу кIоцI IофхэмкIэ и Министерствэ дэжь щызэхащэгъэ Общественнэ советым илIыкIохэр. Джащ фэдэу мы Iофыгъом изэшIохын фэгъэзэгъэ IофшIэкIо куп ведомствэм зэхищагъ.

ХэбзэухъумакIохэм анахьэу анаIэ зытырагъэтыщтыр профилактическэ учетым хэт Iэтахъохэр ары. Джащ фэдэу урокхэр зыщыкIорэ уахътэм зыныбжь имы­къугъэхэр общественнэ чIыпIэхэм ащымыIэнхэм лъып­лъэщтых. Ащ нэмыкIэу кIэлэцIыкIухэм ыкIи ны-тыхэм зэIукIэгъу-зэдэгущыIэгъухэр адашIых, шапхъэу щыIэхэр агъэцэкIэнхэм фаузэнкIых.

Зы нэбгырэ хэкIодагъ

Iоныгъом и 7-м щегъэжьагъэу и 13-м нэс республикэм игъогухэм хъугъэ-шIэгъи 8 къатехъухьагъ. Ахэм зы нэбгырэ ахэкIодагъ, 8-мэ шъобжхэр атещагъэхэ хъугъэ.

Тхьамафэм къыкIоцI гъогурыкIоным ишапхъэхэр гъогогъу 2159-рэ аукъуагъэу хэбзэухъумакIохэм агъэу­нэфыгъ. Ешъуагъэу рулым кIэрысыгъэ водитель 33-мэ административнэ пшъэдэкIыжь арагъэхьыгъ. Мыщ фэдэ хъугъэ-шIагъэхэр анахьыбэу зыщагъэунэфыгъэхэр Мыекъуапэрэ Тэхъутэмыкъое районымрэ. ЛъэсрыкIуи 156-мэ алъэныкъокIэ административнэ протоколхэр зэхагъэуцуагъэх. ГъогурыкIоным ишапхъэхэр жъугъэцэкIэнхэу, сакъы­ныгъэ къызхэжъугъэфэнэу полицием икъулыкъушIэхэр къышъоджэх.

ПсынкIэу зафэжъугъаз

БзэджэшIагъэ къыжъудызэрахьагъэмэ хэгъэгу кIоцI IофхэмкIэ къулыкъухэм псынкIэу зафэжъугъэзэн фае.

Хэбзэгъэуцугъэр зыукъуагъэм ынэгу, ащ щыгъы­гъэр, итеплъэ зыфэдэр шъугу ишъуубыт. ПсынкIэ Iофэу полицием иномерэу 02-м шъутеу, джащыгъум бзэджа­шIэр къаубытынымкIэ амалышIухэр щыIэ мэхъу.

НэкIубгъор зыгъэхьазырыгъэр Тхьаркъохъо Адам.