Илъэс къэс Iоныгъо мазэм къыщегъэжьагъэу чъэпыогъур екIыфэ гриппым пэуцужьырэ вакцинэм ихэлъхьан епхыгъэ Iофтхьабзэр макIо.

А пIалъэм ыуж прививкэр ябгъэшIыми хъущт, ау штаммэу ахалъхьэрэр лъэтемытэу иммунитетым ишIуагъэ екIырэп. Арышъ, гриппыр къызе­жьэрэ жъотыпIэм ар яогъэшIы­жьыкIэ мэхьанэ иIэп.

ЕтIани зыщытымыгъэгъупшэн фаер коронавирусым зиушъомбгъуным ищынагъо джыри зэ­рэщыIэр ары. ГухэкI нахь мы­шIэми, зэпахырэ узитIури зэ­хэ­хьанхэ алъэкIы ыкIи ащ «микс инфекция» раIо. Ащ фэдэ зы­хъурэм, цIыфым ар фэукIочIыщтэп. Ащ пае, Адыгэ Респуб­ликэм псауныгъэр къэу­хъумэгъэнымкIэ и Министерствэрэ Роспотребнадзорым шъолъырымкIэ и ГъэIорышIапIэрэ цIыф­хэм къяджэх мы Iофыр Iэ­пэ­дэлэл амышIынэу, вакцинэр зы­харагъэлъ­хьанэу.

Предприятиеу ыкIи организациеу лъэIу тхылъ зытыгъэхэм адэжь медицинэм иIофышIэхэр кIохэзэ гриппым пэшIуекIорэ прививкэр ахалъхьэ. Мыщ фэдэ Iофтхьабзэм Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыны­гъэхэмкIэ ыкIи къэбар жъугъэм иамалхэмкIэ и Комитет кIэщакIо фэхъуи, ежь епхыгъэ орга­ни­зациехэм яIофышIэхэу шIои-гъо­ныгъэ зиIэхэм Iоныгъом и 15-м вакцинэр ахалъхьагъ.

Ахэр республикэ гъэзетхэу «Адыгэ макъ» ыкIи «Советская Адыгея» зыфиIохэрэр, Адыгэ тхылъ те­дзапIэр, тха­кIохэм я Союз, пстэумкIи нэ­бгырэ 30 фэдиз Iофтхьабзэм хэлэжьагъ.

Апэу Комитетым итхьаматэу Шъхьэлэхъо Аскэр щысэшIу къы­гъэлъэгъуагъ, ащ къы­кIэ­лъыкIуагъ «Адыгэ макъэм» ире­дактор шъхьаIэу Дэрбэ Тимур.

— Илъэс зэкIэлъыкIохэм гриппым пэуцужьырэ прививкэр ясэгъэшIы, — къеIуатэ Шъхьэлэхъо Аскэр. — Бжыхьэ-кIымэфэ лъэхъаным сы­мысымэджахэу сIорэп, ау ар къысэхьылъэкIырэп, псынкIэу сэхъужьы. ТипсауныгъэкIи, тищыIэныгъэкIи вакцинэм мэхьанэ зэриIэр зэхэтшIыкIын фае.

Джащ фэдэу прививкэ языгъэшIынэу къэкIуагъэхэм ащыщэу гущыIэгъу тызыфэхъугъэр Адыгэ тхылъ тедзапIэм иIофы­шIэу Бэщыр Юлие ары.

— БлэкIыгъэ илъэсхэм вакцинэр зыхязгъэлъхьагъэу щытэп, — еIо ащ. — Ау мыгъэ коронавирусым тызэригъэщынагъэм къыхэкIыкIэ джы прививкэр язгъэшIынэу исхъухьагъ. Зэпахырэ узитIур зызэхахьэкIэ щынэгъо дэдэу щыт. Сэ сшъхьэкIэ сизакъоп, тиунагъо исхэм зэкIэми, типхъо­рэлъф-тикъорылъфхэми арагъэ­шIыщт.

Шъугу къэдгъэкIыжьын, рес­публикэм щыкIорэ Iофтхьабзэм къыдыхэлъытагъэу цIыф­хэм япроцент 60-мэ, узыр къяо­лIэнымкIэ «щынагъо» зышъхьащытхэм япроцент 75-мэ вакцинэр ахалъхьащтэу агъэнэфагъ. Адыгэ Республикэм псау­ныгъэр къэухъумэгъэнымкIэ и Министерствэ къызэритыгъэмкIэ, мы уахътэм ехъулIэу нэбгырэ 21177-мэ гриппым пэуцужьырэ прививкэр афашIыгъ, ащ щыщэу нэбгырэ 14112-р ныбжь зиIэх, 7065-р — кIэ­лэцIыкIух. пстэумкIи къаIэкIэ­хьэгъэ вакцинэм ипроцент 25,2-р ахалъхьэгъах.

Iэшъынэ Сусан.