Ны мылъкум къыдэлъытэгъэ ахъщэр зыпэIужъугъэхьан шъулъэкIыщтхэм зэу ащыщ кIэлэцIыкIум иеджэн ыкIи ащ епхыгъэ фэIо-фашIэхэм ащыщхэр.

Ны-тыхэм ащ фэдэ гъэ­­фе­дакIэр къыхахыгъэмэ, ар къыз­щиIорэ лъэIу тхылъ атын фае. Ар «унэе кабинетым» е къэ­ралыгъо фэIо-фашIэхэм япортал щатын алъэкIыщт, ПенсиехэмкIэ фондым ичIыпIэ ор­ганэу зэпхыгъэхэм е МФЦ-м якIуалIэхэми хъущт.

Ны мылъкур кIэлэцIыкIум иеджэн имызакъоу, общежитием зэрэщыпсэурэм ыпкIэ пэIуа­гъэхьани алъэкIыщт. Къыхэдгъэ­щымэ тшIоигъор сертификатыр къызфатыгъэм имызакъоу, нэмыкI кIэлэцIыкIоу унагъом исэм ащыщ иегъэджэн пэIуа­гъэхьа­нэуи фитыныгъэ зэряIэр ары.

Гъэсэныгъэм иучреждениеу зыщеджэщтыр Урысыем итхэм ащыщын, мы лъэныкъомкIэ Iоф ышIэнэу фитыныгъэ къезытырэ тхылъыр иIэн фае. НэмыкI шапхъэу программэм къыщыдэлъытагъэхэм ащыщ, кIэлэцIыкIум еджэныр зыщы­ригъэжьэщт уахътэм ыныбжь илъэс 25-м шъхьарымыкIы­гъэныр.

Сабыим ыныбжь илъэси 3 зыхъукIэ иегъэджэн пае ахъщэр агъэфедэнэу ны-тыхэм фитыныгъэ яIэ мэхъу, ащ нэсыфэкIэ еджапIэм чIэхьаным ыпэкIэ гъэсэныгъэ егъэгъотыгъэным пэIуагъэхьан алъэкIыщт.

Ахъщэр унагъом къыфалъы­тэным пае кIэлэцIыкIур зы­чIэхьэгъэ еджапIэм зэзэгъы­ны­гъэу дашIыгъэм техыгъэ тхы­лъыр ПенсиехэмкIэ фондым IэкIагъэхьан фае. ЕджапIэм чIэмыхьэзэ гъэсэныгъэ рагъэгъотынэу, ащ ны мылъкур пэ­Iуагъахьэ ашIоигъоми ащ фэд шапхъэу пылъыр.

Шъугу къэдгъэкIыжьын, 2020-рэ илъэсым апэрэ сабыим пае ахъщэу ны мылъкум къыдэлъы­тагъэр сомэ 466617-рэ мэхъу, ятIонэрэм пае къатырэр сомэ 616617-рэ. Ны мылъкум фэгъэ­хьыгъэ программэр зыщыIэм къыщегъэжьагъэу Адыгеим щы­псэоу унэгъо 1000-мэ кIэлэцIыкIум иегъэ­джэн ахъщэр пэIуагъэхьанэу лъэIу тхылъ къатыгъ.

УФ-м ПенсиехэмкIэ ифонд и къутамэу АР-м щыIэм ипресс-къулыкъу.