Лъэпкъ ыкIи федеральнэ проектхэр зыщагъэцэкIэрэ лъэхъаным хэбзэукъоныгъэхэр щымыIэнхэм, общественнэ щынэгъончъэныр къэухъумэгъэным, лъыхъон волонтер отрядхэмрэ хэбзэухъумэкIо къулыкъухэмрэ язэпхыныгъэ гъэпытэгъэным, нэмыкI Iофыгъохэми щатегущыIагъэх правопорядкэмкIэ республикэ комиссием изэхэсыгъоу тыгъуасэ щыIагъэм. Iофтхьабзэр зэрищагъ Адыгеим и ЛIышъхьэу КъумпIыл Мурат.

Лъэпкъ ыкIи федеральнэ проектхэм алъэныкъокIэ зэхащэрэ уплъэкIун Iоф­тхьабзэхэм къатегущыIагъэх къэралыгъо финанс уплъэкIуным АдыгеимкIэ и ГъэIо­рышIапIэ ипащэу Насыфэ Марианэрэ АР-м и УплъэкIо-лъытэкIо палатэ итхьаматэ ипшъэрылъхэр зыгъэцэкIэрэ Павел Стаценкэмрэ. Ахэм къызэраIуагъэмкIэ, бюджет ахъщэр, IофшIэнхэм ыкIи фэIо-фашIэхэм апэIухьэрэ мылъкур гъэфедагъэхэ зэрэхъурэр, зэзэгъыныгъэхэр хэбзэгъэуцугъэм диштэу гъэцэ­кIэгъэнхэм лъыплъэгъэныр ары анахьэу анаIэ зытетыр.

Хэукъоныгъэу къыхагъэщыгъэхэм республикэм ипащэхэмрэ хэбзэухъу­- мэкIо къулыкъухэмрэ ащагъэгъуазэх.

— Лъэпкъ проектхэм къадыхэлъытэгъэ Iофтхьабзэхэм ягъэцэкIэн пэIухьэрэ федеральнэ мылъкур гъэфедагъэ зэрэ­хъурэм пшъэдэкIыжь зыхьырэ министерствэхэр ыкIи ведомствэхэр, джащ фэдэу муниципалитетхэм япащэхэр пытагъэ хэлъэу лъыплъэнхэ фае. Къэралыгъом и Президент пшъэ­рылъ гъэнэфагъэхэр къытфишIыгъэх, ахэр зэрифэшъуа­шэу дгъэцэкIэнхэ фае, — къы­Iуагъ Адыгеим и ЛIышъхьэ.

Общественнэ щынэгъончъэныр къэу­хъумэгъэнымкIэ хэбзэухъумакIохэм зэшIуахырэм къытегущыIагъ АР-м хэ­гъэгу кIоцI IофхэмкIэ иминистрэ ипшъэрылъхэр зыгъэцэкIэрэ БрантI Мурадин.

Волонтер-лъыхъуакIохэм ягъэхьазырын зэхэщагъэ зэрэхъурэм иIофыгъо къыщыуцугъ Адыгеим граждан зыухъумэжьынымкIэ ыкIи ошIэ-дэмышIэ IофхэмкIэ и Комитет итхьаматэу Вячеслав Лотаковыр. Ащ къызэриIуагъэмкIэ, зыдэ­хъугъэр амышIэрэ цIыфхэр къэгъо­тыжьыгъэнхэм фытегъэпсыхьэгъэ Iоф­тхьабзэхэр мы илъэсым республикэм щызэхащэщтых. Ащ нэмыкIэу къушъхьэ­хэм ащыкIодыгъэ цIыфхэм якъэгъотыжьынкIэ мэфищым телъытэгъэ егъэ­джэнэу рагъэкIокIыгъэм Адыгеим, Дагъыстан, Къэбэртэе-Бэлъкъарым, Къэрэщэе-Щэрджэсым, Краснодар краим ялIыкIохэр хэлэжьагъэх.

Хэбзэнчъэу псэуалъэхэр зышIыхэрэр къыхэгъэщыгъэнхэм, ахэр щыгъэзые­гъэнхэм иIофыгъуи къэзэрэугъоигъэхэм мэхьанэшхо ратыгъ. ПсэупIэ инспекцием ипащэ игуадзэу Илона Кравцовам къызэриIуагъэмкIэ, 2020-рэ илъэсым уплъэ­кIуни 106-рэ зэхащагъ. Хэукъоныгъэ 43-рэ къыхагъэщыгъ, ахэм ащыщэу 33-р дагъэзыжьыгъэх.

ПсэолъэшIын хъызмэтым ылъэны­къокIэ Iофхэм язытет анаIэ нахь тырагъэтынэу, хэбзэнчъэу псэуалъэхэр амышIынхэм лъыплъэнхэу республикэм ипащэ ащ фэгъэзэгъэ пстэуми пшъэрылъ къафишIыгъ.

АР-м и ЛIышъхьэ ипресс-къулыкъу.