АР-м изаконэу хэушъхьафыкIыгъэ цIыф купхэм социальнэ IэпыIэгъу ятыгъэным фэгъэхьыгъэм къызэрэщыдэлъытагъэм тетэу, сэкъатныгъэ имыIэу, ау ипсауныгъэ изытеткIэ протез-ортопедическэ псэуалъэ зищыкIагъэхэм, кIэлэцIыкIоу зыныбжь илъэс 18-м шIомыкIыгъэхэри ахэтхэу, ыпкIэ хэмылъэу аIэкIагъахьэх.

— БлэкIыгъэ илъэсхэм къызэрагъэлъэгъуагъэмкIэ, ахэр нахьыбэу кIэлэцIыкIухэр ары зищыкIагъэ хъурэр. Протез-ортопедическэ псэуалъэхэр игъом аIэкIахьэхэу, зэрищыкIагъэм фэдизрэ агъэфедэхэмэ, сэкъатныгъэ яIэ хъущтэп. Ащ фэдэ цуакъэхэм ятIысыкIэ, якIуакIэ зыпкъ рагъэуцонхэр, алъэгу зэщизы мыхъуныр ары пшъэрылъ шъхьаIэу яIэр, — къыщыхагъэщыгъ АР-м IофшIэнымкIэ ыкIи социальнэ хэхъоныгъэмкIэ и Министерствэ.

БлэкIыгъэ 2019-рэ илъэсым протез-ортопедическэ пкъыгъохэр ыпкIэ хэмылъэу нэбгырэ 491-мэ аIэкIагъэ­хьагъ. Ащ сомэ миллионрэ мин 920-рэ пэIухьагъ. 2020-рэ илъэсэу тызыхэтым мыщ фэдэ IэпыIэгъум пае сомэ миллиони 3,5-рэ республикэ бюджетым щагъэнэфагъ.

АР-м IофшIэнымкIэ ыкIи социальнэ хэхъоныгъэмкIэ и Министерствэ зыныбжь илъэс 18-м шIомыкIыгъэ кIэлэцIыкIоу, сэкъатныгъэ имыIэу, ау ипсауныгъэ изытеткIэ протез-ортопедическэ цуакъэ зищыкIагъэхэм афэщэфыгъэнхэм пае сомэ миллиони 3-рэ мини 136,7-рэ ауасэ къэралыгъо зэзэгъыныгъэ ышIыгъ. Ащ цокъэ зэштэгъу 684-рэ къыхьыщт. Мы уахътэм зэштэгъу 54-мэ апае тхылъхэр агъэхьазырых.