Урысые кIэлэцIыкIу гупчэу «Орленок» зыфиIорэм зыщыз­гъэпсэфыщт ныбжьыкIэхэр Адыгэ Республикэм гъэсэны­гъэмрэ шIэныгъэмрэкIэ и Мини­стерствэ къыхехых. 2020-рэ илъэсым Iоныгъом и 7 — 27-м республикэм икIэлэцIыкIу 90-мэ а гупчэм зыщагъэпсэфыщт.

Лъэныкъо зэфэшъхьафхэмкIэ шъо­лъыр ыкIи Урысые зэнэкъо­къухэу рекIокIы­гъэхэм текIоныгъэ къащыдэзыхыгъэхэр ыкIи къащыхэщыгъэхэр «Орленкэм» агъакIох.

ЗэкIэми тыщыгъуаз гупчэу «Орленок» зыфиIорэр Урысыем ит кIэлэцIыкIу зыгъэпсэфыпIэ пстэуми апэ зэритыр. Мыщ зэпымыоу илъэс псэум Iоф ешIэ. КIэлэцIыкIухэр къызди­кIыхэрэ чIыпIэхэм гъунапкъэ яIэп — Калининград къыщегъэ­жьагъэу Владивосток нэс, Сыктывкар ыкIи Воркута къащыкIэдзагъэу Хакассием ыкIи Тува анэсыжьэу. Ахэр сменэ пчъагъэу зэтеутыгъэх.

«Орленкэр» къызэрыкIо зыгъэпсэфыпIэу зэрэщымытым тыщыгъуаз. УкъэкIон ущычъыен, ущышхэн, зыщыбгъэпсэфын закъор арэп, лъэныкъо пстэумкIи кIэлэцIыкIухэр апIунхэмкIэ, рагъэджэнхэмкIэ къэралыгъо политикэ гъэнэфагъэ мыщ щызэрахьэ. НыбжьыкIэхэм щыIэныгъэм зыкъыхагъотэнымкIэ ашIогъэшIэгъоныщт программэ зэфэшъхьафыбэхэмкIэ щыра­гъаджэх.

Iэшъынэ Сусан.