2020-рэ илъэсым иапэрэ илъэсныкъо шъолъырым социальнэ-эконо­микэ хэхъоныгъэу ышIыгъэхэм язэфэхьысыжьхэр АР-м иминистрэхэм я Кабинет изэхэсыгъо щашIыгъэх. Iофтхьабзэм тхьамэтагъор щызэрихьагъ Адыгэ Республикэм и ЛIышъхьэу КъумпIыл Мурат.

Республикэм ипащэ зэхэсыгъом пэублэ псалъэ къыщишIызэ Iофыгъоу зытегущыIэхэрэм мэхьанэшхо зэряIэр хигъэунэфыкIыгъ.

— Экономикэм илъэныкъо зырызхэмкIэ къэгъэлъэгъонхэр къеIыхыгъэх. АщкIэ зиягъэ къэкIуа­гъэр зэпахырэ узэу коронавирусым къыздихьыгъэ гумэкIыгъохэр ары. Отраслэ пэпчъ Iофхэм язытет зэхэфыгъэным ыкIи ащ къыдыхэлъытагъэу экономикэм хэхъоныгъэ ышIыным тынаIэ тедгъэтын фае, — къыIуагъ КъумпIыл Мурат.

АР-м экономикэ хэхъоныгъэм­кIэ ыкIи сатыумкIэ иминистрэу Геннадий Митрофановым къызэриIуагъэмкIэ, промышленнэ къыдэгъэкIыным ииндекс хэхъо­ныгъэшIухэр ышIыгъэх ыкIи 2019-рэ илъэсым имэзих егъэ­пшагъэмэ проценти 108,8-рэ мэхъу. Мы къэгъэлъэгъонымкIэ Адыгеим апэрэ чIыпIэр Къыблэ федеральнэ шъолъырым щиIыгъ. Мэкъумэщ хъызмэтри зыпкъ ит, чIэнагъэ ышIыгъэп пIоми ухэу­къощтэп.

Ащ дакIоу псэолъэшIыным, зекIон индустрием, потребительскэ бэдзэрым алъэныкъокIэ къэгъэлъэгъонхэр къеIыхыгъэх. ЦIыфхэм яхахъохэр нахь макIэ зэрэхъугъэм ыкIи пандемием илъэхъан псэуалъэхэм ащыщхэр зэрэзэфашIыгъэхэм къыхэкIыкIэ розничнэ сатыушIыныр проценти 5,1-кIэ къеIыхыгъ.

БлэкIыгъэ илъэсым мыщ фэдэ иуахътэ егъэпшагъэмэ, псэолъэ­шIыным епхыгъэ IофшIэным изыплIанэ къыщыкIагъ.

ЗекIоным епхыгъэ IофшIэныр 2020-рэ илъэсым иапэрэ мэзищ ныIэп загъэцэкIагъэр. Ащ къыхэ­кIыкIэ 2019-рэ илъэсым елъытыгъэмэ зекIохэм япчъагъэ фэди 2,4-кIэ къыщыкIагъ ыкIи нэбгырэ мин 58-рэ хъугъэ. Мы илъэсым телъытагъэу инвестициехэмкIэ IофшIэным мылъкоу халъхьащтым къыщыкIэщтэу ары пэшIорыгъэшъэу зэрегупшысэхэрэр. Ащ ушъхьагъу шъхьаIэу фэхъухэрэм ащыщ предприятиехэм заушъомбгъунымкIэ ыкIи кIэу ашIынхэмкIэ энергокIуачIэхэм зэращыкIэхэ­рэр. Мы гумэкIыгъор дэгъэзыжьыгъэным фэшI республикэм чанэу Iоф адешIэ Урысыем энергетикэмкIэ и Министерствэ, компаниехэу «Газпром», «Россети», «Кубаньэнерго» зыфи­Iохэрэм. ГущыIэм пае, Адыгеим гъэстыныпхъэ шхъуантIэ къы­IэкIэхьаным ыкIи ар зищыкIагъэхэм ящэлIэгъэным фытегъэ­псыхьэгъэ Программэ агъэнэфагъ, ар 2021 — 2025-рэ илъэс­хэм ателъытагъ. Респуб­ликэмрэ ПАО-у «Газпром» зыфиIорэмрэ илъэсэу тызыхэтым ичъэпыогъу мазэ мы зэзэгъыныгъэм зэдыкIэтхэнхэу агъэнафэ.

— Пандемием илъэхъан экономикэм ыкIи цIыфхэм IэпыIэгъу афэхъугъэнымкIэ къэралыгъом ипащэхэм унашъоу ашIыгъэхэм яшIогъэшхо къэкIуагъ. Ау лъэныкъо зэфэшъхьафхэмкIэ Iофхэм язытет зыпкъ идгъэуцожьын ыкIи къэгъэлъэгъон гъэнэфагъэхэм талъыIэсын зэрэфаер зыщыдгъэгъупшэ хъущтэп. Къэралыгъо программэхэм амалэу къатыхэрэр къызфагъэфедэзэ шъолъыр министерствэхэм ыкIи ведомствэхэм пшъэрылъхэр зэшIуахынхэ фае, — къыIуагъ республикэм ипащэ.