АР-м иминистрэхэм я Кабинет изэхэсыгъо Iофыгъо шъхьаIэу къыщаIэтыгъэхэм ащыщ псауныгъэр къэухъумэгъэнымкIэ лъэпкъ проектхэм къадыхэлъытэгъэ Iофтхьабзэхэм ягъэцэкIэн.

Мыщ епхыгъэу къэгущыIагъ Адыгеим псауныгъэр къэу­хъумэгъэнымкIэ иминистрэу Мэрэтыкъо Рустем. Ащ къызэриIуагъэмкIэ, 2020-рэ илъэсым мы проектым игъэцэкIэн сомэ миллион 829,5-рэ шъолъырым щыпэIуагъэхьащт. Джырэ уахътэм фельдшер-мамыку IэзэпIэ 23-рэ ашIы. Ащ нэмыкIэу Адыгэ республикэ клиническэ ыкIи Мыекъопэ къэлэ клиническэ сымэджэщхэм медицинэ оборудование 97-рэ къафащэфыгъ.

Инсульт, инфаркт зиIагъэхэм ящыкIэгъэ Iэзэгъу уцхэр аIэкIэгъэхьэгъэнхэм анаIэ тет. Мы лъэныкъом пэIуагъэхьанэу федеральнэ гупчэм сомэ миллион 49-рэ къафитIупщыгъ.

Шъолъыр проектэу «Развитие детского здравоохранения» зыфиIорэм къыдыхэлъытагъэу республикэм имедицинэ учреж­дениехэм оборудование 32-рэ атырагощагъ.

Лъэпкъ проектэу «Демографием» къыдыхэлъытэгъэ Iоф­тхьабзэхэм ягъэцэкIэн шъолъы­рым щыпылъых, анахьэу анаIэ зытырагъэтыхэрэр нахьыжъхэм IэпыIэгъу афэхъугъэныр ары.

Ащ дакIоу коронавирусым ыпкъ къикIыкIэ медицинэм ылъэ­ныкъокIэ IофшIэным зэхъо­кIыныгъэхэр зэрэфэхъугъэхэр, фэIо-фашIэхэм ащыщхэм ягъэцэкIэн къызэтырагъэуцон фаеу зэрэхъугъэр министрэм къыI­уагъ. КъумпIыл Мурат псауныгъэр къэухъумэгъэнымкIэ пшъэрылъ шъхьаIэхэр къыгъэнэфагъэх, ащкIэ шъолъырыр къэгъэлъэ­гъон гъэнэфагъэхэм акIэхьан зэрэфаер хигъэунэфыкIыгъ.

— Пандемиер къызежьагъэм ыуж охътэ кIэкIым госпиталищ дгъэпсыгъэ, ахэм ящыкIагъэр зэкIэ аIэкIэ­дгъэхьагъ. Джы плановэ режимым тытетэу шэпхъэшIухэм адиштэу медицинэ фэIо-фашIэхэр тицIыфхэм ядгъэгъотыным ткIуа­чIэ етхьылIэн фае, — къыIуагъ АР-м и ЛIышъхьэ.