Адыгеим ичIыгулэжьхэм гъэтхэсэ гектар 102657-рэ мыгъэ апхъы­гъагъ. Ащ инахьыбэр, 55069-р, тыгъэгъазэм рагъэубытыгъ, чылапхъэ ашIыщт натрыфэу гектар 24352-рэ, былымIус ашIынэу 1388-рэ халъхьагъ, соер гектар 7081-рэ, пынджыр гектар 9624-рэ мэхъух.

Мы мафэхэм ахэм ащыщхэр Iуа­хыжьых. АР-м мэкъу-мэщымкIэ и Министерствэ Iоныгъом и 9-м тызэрэщигъэгъозагъэмкIэ, тыгъэгъазэр, былымIус ашIыщт натрыфыр, соер ары аIожьыхэ- рэр. Тыгъэгъазэм гектар 23825-рэ хагъэкIыгъ. ГурытымкIэ лъытагъэу, зым центнер 21,3-рэ къырахыжьы. АщкIэ пэрытныгъэр зыIыгъхэр Кощхьэблэ (центнер 22-рэ), Шэуджэн (центнер 22-рэ) ыкIи Мыекъопэ (центнер 21,8-рэ)районхэм ячIыгулэжьхэр ары. МэкIэ дэдэу ахэм ауж къенэ Джэджэ районыр. Ащ центнер 21,5-рэ къыщырахы.

БылымIус ашIынэу натрыф зыщыхалъхьэгъагъэр Кощхьэблэ, Красногвардейскэ, Джэджэ, Мыекъопэ ыкIи Теуцожь районхэр ары. ЗэкIэми ар ащыIуахыжьы, нахь макIэу зыпхъыгъагъэхэм аухыгъ.

Соем иIожьыни Джэджэ, Кощхьэблэ, Мыекъопэ ыкIи Теуцожь районхэм ячIыгулэжьхэм рагъэжьагъ. Зы гектарым, гурытымкIэ лъытагъэу, центнер 24-рэ къырахы, тонн 4628-рэ къаугъоижьы­гъах.

Джащ фэдэу хэтэрыкI гектар 218-рэ пстэумкIи мыгъэ Адыгеим щагъэтIысхьэгъагъ. Ар, зэкI пIоми хъунэу, Iуахы­жьыгъ. ПстэумкIи тонн 1411-рэ къау­гъоижьыгъ. Картошкэ гектар 64-м щыщэу 55,5-ри хахыжьыгъ, ащ тонн 717-рэ къытыгъ.

Нашэ, хъырбыдз ыкIи къэбжъые зыгъэтIысхьэгъагъэхэр Джэджэ ыкIи Шэуджэн районхэр ары. ПстэумкIи гектар 522-рэ хъущтыгъэ, тонн 2250-рэ къаугъоижьыгъах.

ЧIыгулэжьхэм гъэтхасэхэм яIухыжьын дакIоу бжыхьасэхэм чIыгухэр афагъэ­хьазырых. Муниципальнэ образованиитIумэ, Джэджэ ыкIи Теуцожь районхэм кIымафэр изыхыщт рапсым ипхъын ащырагъэжьагъ.

ХЪУТ Нэфсэт.