Адыгэ Республикэм и ЛIышъхьэу КъумпIыл Мурат тыгъуасэ зэхищэгъэ IофшIэгъу зэхэсыгъом хэлэжьагъэх АР-м иминистрэхэм я Кабинет хэтхэр, муниципалитетхэм япащэхэр. Къэралыгъо программэхэм ыкIи федеральнэ проектхэм шъолъырыр зэрахэлажьэрэм иIофыгъу ары анахь шъхьаIэу щытыгъэр.

Адыгеим псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевым къызэриIуагъэмкIэ, проектэу «Псы къабз» зыфиIорэм къыдыхэлъытагъэу 2021-рэ илъэсым муниципалитети 5-мэ Iофтхьэбзи 7 ащызэхащэщт, ащ сомэ миллиони 127,8-рэ апэIуагъэхьащт.

— Къагъэнэфэгъэ пIалъэм ехъу­лIэу муниципалитетхэм зэкIэми проектнэ-сметнэ документациер къагъэхьазырын фае. ПшъэдэкIыжь зыхьырэ рес­публикэ ведомствэхэр ахэм IэпыIэгъу афэхъущтых, ащ хэхьэ инфраструктурэм еп­хыгъэ Iофыгъохэри, — къыхигъэщыгъ АР-м и ЛIышъхьэ.

Коммунальнэ инфраструктурэм ипсэуалъэхэм ягъэкIэжьын фытегъэпсыхьэгъэ проектхэм якъыхэхынкIэ зэнэкъо­къоу зэхащагъэм Мыекъуапэрэ Адыгэкъалэрэ зэрэхэлэжьэщтхэ шIыкIэми къэзэрэу­гъоигъэхэр тегущыIагъэх. Iофтхьабзэм икIэщакIор псэупIэ-коммунальнэ хъыз­мэтым хэхъоныгъэ ышIыным IэпыIэгъу фэхъугъэнымкIэ Фондыр ары.

Тхылъхэр игъом гъэхьазырыгъэнхэм ыкIи фондым илимитхэр зэрифэшъуашэу гъэфедэгъэнхэм мэхьанэшхо зэриIэр республикэм ипащэ хигъэунэфыкIыгъ.

Шъолъыр проектэу «Iэрыфэгъу къэлэ щыIакIэр гъэпсыгъэныр» зыфиIорэм къыдыхэлъытэгъэ лъэныкъохэр зэшIохыгъэхэ зэрэхъурэм иIофыгъуи зэхэсы­гъом къыщагъэнэфагъ. КъызэраIуагъэмкIэ, Мыекъуапэ иобщественнэ чIыпIэу «Солдатский родник» зыфиIорэм IофшIэнхэр процент 80-м нэсэу щагъэцэкIагъэх. Мылъкоу къызэтырагъэнагъэм ишIуа­гъэкIэ щагуитфым IофшIэн тедзэхэр ащыкIощтых.

Къэлэ цIыкIухэм я Урысые зэнэкъокъу изэфэхьысыжьхэм къадыхэлъытагъэу Адыгэкъалэ дэт саугъэтэу «ТекIоныгъ» зыфиIорэм къыпэIулъ чIыпIэр зэтырагъэпсыхьэ, непэрэ мафэм ехъулIэу процент 82-р агъэцэкIагъ.

КъумпIыл Мурат къалэхэм япащэхэм пшъэрылъ афишIыгъ мы IофшIэнхэр псынкIэу аухыжьынхэу ыкIи 2021-рэ илъэсым телъытэгъэ проектхэм ягъэцэкIэн зыфагъэхьазырынэу.

— Пшъэрылъэу зыфэдгъэуцу­жьыгъэхэр шэпхъэшIухэм адиштэу пIалъэу дгъэнэфагъэм ехъулIэу зэшIотхынхэ фае. Феде­ральнэ проектхэр шIуа­гъэ къытэу зэрэдгъэцакIэ­хэрэм елъы­тыгъ тицIыф­хэм псэукIэ амалэу яIэщтыр зыфэ­дэр, — къыIуагъ рес­публикэм ипащэ.

Жъы хъугъэ унэхэм арысхэр гъэкощыгъэнхэм фытегъэпсыхьэгъэ программэм игъэцэкIэн мэхьанэшхо зиIэ лъэныкъохэм ащыщ. Адыгеимрэ мыщ фэгъэзэгъэ Фондымрэ зэзэгъыныгъэ те­дзэу зэдашIыгъэм къызэригъэнафэрэмкIэ, 2022-рэ илъэсым тыгъэгъазэм и 31-м нэс пшъэрылъыр шъолъырым щызэшIохыгъэ хъущт.

— Агъэкощырэ цIыфхэм шэпхъэшIухэм адиштэрэ унакIэхэр афэшIыгъэнхэм мэхьанэшхо иI. ПсэолъэшIыным хэхъоныгъэ ышIыным, респуб­ликэм щыпсэухэрэм IофшIэпIэ чIыпIакIэхэр яIэнхэм программэр фэIорышIэщт. Лъэпкъ проектхэм къадыхэлъытагъэу УФ-м и Президент къыгъэуцугъэ пшъэрылъхэри мыщкIэ зэшIохыгъэ мэхъух, — къыIуагъ Адыгеим и ЛIышъхьэ.

Аварийнэ унэхэм яреестрэ изэхэгъэу­цон епхыгъэ IофшIэныр нахь агъэ­псынкIэнэу республикэм ипащэ пшъэ­рылъ къыгъэуцугъ. 2017-рэ илъэсым ыуж псэупIэ квадратнэ метрэ мини 4,5-рэ мыщ хатхагъ.

Культурэм ипсэуалъэхэм яматериальнэ-техническэ зытет нахьышIу шIыгъэным иIофыгъуи зэхэсыгъом къыщаIэтыгъ. Министрэу Аулъэ Юрэ мыщ епхыгъэу къэгущыIагъ ыкIи 2021 — 2022-рэ илъэсхэм ателъытагъэу учреждениехэм игъэ­кIотыгъэ гъэцэкIэжьынхэр яшIылIэгъэнхэм фэшI игъом тхьапэхэр къагъэхьазырынхэу муниципалитетхэм пшъэрылъ афишIыгъ.

Къоджэ чIыпIэхэм хэхъоныгъэ ашIыным ипрограммэ гъэцэкIагъэ зэрэхъурэм зэхэсыгъом икIэух къэзэрэугъоигъэхэр щытегущыIагъэх. Мы программэм зэкIэмкIи проект 67-рэ къыдыхэлъытагъ, ахэм сомэ миллион 917-рэ атефэ.

— Урысыем и Президентэу Владимир Путиным къы­гъэнэфэгъэ пшъэрылъхэм ягъэцэкIэн мы программэхэр фэIорышIэх. Лъэпкъ проектхэм яшIуагъэкIэ Адыгеим IофшIэнышхо щэкIо, ар къызэтетымыгъэуцоу ыпэкIэ тылъыкIотэн фае, — къыIуагъ КъумпIыл Мурат.