Адыгэ Республикэм и ЛIышъхьэу КъумпIыл Мурат ПАО-у «Газпром» зыфиIорэм иIофшIэкIо куп ипащэу, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгазым» хабзэм икъулыкъухэм ыкIи шъолъырхэм адэлэжьэгъэнымкIэ генеральнэ директорым игуадзэу Денис Волковым зэIукIэгъу дыриIагъ.

Iофтхьабзэм хэлэжьагъэх Адыгеим ивице-премьерэу Сапый Вячеслав, АР-м экономикэ хэхъоныгъэмкIэ ыкIи сатыумкIэ иминистрэу Геннадий Митрофановыр, республикэм псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан, ПАО-у «Газпромым» иподразделениехэм япащэхэр.

Адыгеим и ЛIышъхьэ зэIукIэгъум пэублэ псалъэ къыщишIызэ, псэупIэхэм гъэстыныпхъэ шхъуантIэр ящэлIэгъэным ыкIи газ инфраструктурэм хэхъоныгъэ ышIыным республикэм мэхьанэшхо зэрэщыратырэр хигъэунэфыкIыгъ. Лъэпкъ проектхэм ягъэцэкIэн къыдыхэ­лъытагъэу псэупIэхэм яшIынкIэ, бизнес цIыкIум ыкIи гурытым хэхъоныгъэ ашIынымкIэ, шэпхъэшIухэм адиштэрэ ыкIи янэкъокъун зылъэкIыщт продукцие къыдэгъэкIыгъэнымкIэ, нэмыкIхэмкIи шъолъырым пшъэрылъ гъэнэфагъэхэр къыфагъэуцугъэх.

Мэхьанэшхо зиIэ лъэныкъохэм ащыщ предприятиякIэхэр къызэIуахыхэзэ промышленностым хэхъоныгъэ егъэшIыгъэ­ныр. Псэуалъэхэм яшIынкIэ амалышIоу ыкIи IэпыIэгъушIоу щытыщт Яблоновскэ индустриальнэ паркым игъэпсын.

— Къэгъэлъэгъон гъэнэфагъэхэм талъыIэсын зэрэфаем дакIоу, ыпэ титэу шъолъырым хэхъоныгъэ едгъэшIыным непэ Iоф дэтэшIэ. Адыгеим социальнэ-экономикэ хэхъоныгъэ ышIыным иунэе программэу 2020 — 2024-рэ илъэсхэм ателъытагъэр Урысыем и Правительствэ ыштагъ. Ащ илъэныкъо шъхьаIэхэм ащыщ инфраструктурнэ пэрыохъухэр дэгъэзыжьыгъэнхэр, — къы­Iуагъ КъумпIыл Мурат.

Гъэстыныпхъэ шхъуантIэр зэрифэ­шъуашэу аIэкIэгъэхьэгъэным фэшI рес­публикэм хэхъоныгъэ ышIынымкIэ иунэе программэ Iофтхьэбзэ зэфэшъхьафхэр къыдыхалъытагъэх. Ахэм ащыщых газрыкIуапIэр ыкIи ар зыщызэбгыращыщт станциеу «Новый сад» зыфиIорэм ишIын, мыщ фэдэ псэуалъэхэу «Псэкъупс», «Хьащтыку», «Прикубанскэр» зыфи­Iохэрэм ягъэцэкIэжьын. Адыгэкъалэ, Тэхъутэмыкъое ыкIи Теуцожь районхэм хэхъоныгъэ ашIыным мы пстэури фэIорышIэщт.

Газпромым иIофышIэ купрэ пшъэ­дэкIыжь зыхьырэ республикэ къулы­къухэмрэ зэгъусэхэу Адыгеим гъэстыныпхъэ шхъуантIэр къыIэкIэхьаным ыкIи ар зищыкIагъэхэм ящэлIэгъэным фытегъэпсыхьэгъэ Программэр агъэнэ­- фагъ, ар 2021 — 2025-рэ илъэсхэм ате­лъытагъ.

— Республикэм ипащэхэм япредложениехэр къыдэт­лъытэзэ Программэр дгъэхьазырыгъэ. Газпромым иинвестициехэр сомэ миллиарди 3 хъунэу тэгъэнафэ. Iофтхьабзэу зэхэтщэщтхэм шIуагъэ къатынэу, шъолъырым социальнэ-экономикэ хэхъоныгъэ рагъэшIынэу тыщэгугъы, — къыIуагъ Денис Волковым.

Адыгеимрэ ПАО-у «Газпром» зыфиIорэмрэ илъэсэу тызыхэтым ичъэпыогъу мазэ зэфэхьысыжь документым зэдыкIэтхэнхэу агъэнафэ.

АР-м и ЛIышъхьэ  ипресс-къулыкъу.