АР-м и ЛIышъхьэу КъумпIыл Мурат тхьамэтагъор зыщызэрихьэгъэ зэхэсыгъо къолъхьэ тын-Iыхыным пэшIуекIогъэным фэгъэзэгъэ Комиссиеу АР-м щызэхащагъэм иIагъ.

Мы лъэныкъом фэгъэхьыгъэ хэбзэгъэуцугъэр къэралыгъо ыкIи къэралыгъо граждан IэнатIэхэм аIутхэм зэрагъэцакIэрэр ары анахьэу ащ хэлэжьагъэхэр зытегущыIагъэхэр. Доклад шъхьаIэр къышIыгъ къолъхьэ тын-Iыхыным епхыгъэ бзэджэшIагъэхэр ыкIи нэмыкI хэбзэукъоныгъэхэр зэрамыхьанхэм- кIэ АР-м и ЛIышъхьэ дэжь щызэхащэгъэ ГъэIорышIапIэм ипащэу ОелI Юрэ.

ГъэIорышIапIэмрэ прокуратурэмрэ зэгъусэхэу уплъэкIунхэр зэхащэгъагъэх. Ахэм къагъэлъэгъуагъэхэм къапкъырыкIыхэзэ, законыр зыукъогъэ нэбгырэ 22-мэ пшъэдэкIыжь арагъэхьыгъ. Ащ нэмыкIэу Мыекъопэ район администрацием икъулыкъушIэхэм ащыщ мылъкоу къыIэкIахьэрэмрэ ыгъэкIодырэмрэ зэрэзэтемыфэхэрэм фэгъэхьыгъэ тхылъхэр прокуратурэм ратыгъэх.

— Мы Iофым мымакIэу тытегущыIэ, ГъэIорышIапIэу ащ фэгъэзагъэм иIофы­шIэхэм яшIэныгъэ хагъэхъуагъ, коррупцием пэшIуекIогъэнымкIэ анахьэу унаIэ зытетын фаехэр дгъэ­нэфагъэх. Непэ анахьыбэу хэукъоныгъэу ашIыхэрэр тхылъхэм ягъэпсын зыфэгъэхьыгъэхэр. Кадрэхэм афэгъэзэгъэ къулыкъухэм яIофшIэн нахь агъэлъэшынышъ, къэралыгъо къулыкъушIэхэм мылъкоу къаIэкIахьэрэр зыфэдизыр игъом къа­гъэлъэгъон фае. Хэукъоныгъэ ин зышIыхэрэм пхъашэу пшъэдэкIыжь ахьыщт, — къыIуагъ АР-м и ЛIышъхьэ.

Къолъхьэ тын-Iыхыным пэшIуекIогъэ­нымкIэ муниципальнэ комиссиеу Красногвардейскэ, Мыекъопэ ыкIи Тэхъутэмыкъое районхэм ащызэхащагъэхэм яIофшIэни мы зэхэсыгъом щытегущыIагъэх.

АР-м и ЛIышъхьэ ипресс-къулыкъу