Урысые Федерацием и Федеральнэ ЗэIукIэ и Къэралыгъо Думэ идепутатэу Хьасанэкъо Мурат, Урысые политикэ партиеу «Единэ Россием» къыфишIыгъэ пшъэрылъыр ыгъэцакIэзэ, Iудзыгъэ шIыкIэм тетэу псауныгъом икъэухъумэн епхыгъэ IофыгъохэмкIэ Урысые по­литикэ партиеу «Единэ Россием» и Тхьаматэу Д. А. Медведевым ишъолъыр общественнэ приемнэ цIыфхэм щадэгущыIагъ.

Республикэм щыщхэмрэ ихьакIэхэмрэ псауныгъэм икъэу­хъумэнкIэ гумэкIыгъоу яIэхэм депутатыр щагъэгъозагъ. Мые­къуапэ щыщ нэбгырэ заулэмэ коронавирусыр къапымыпкIэнымкIэ вакцинакIэу «Гам-КОВИД-Вак-Лио» зыфиIорэр Адыге­им къызыIэкIэхьащт пIа­лъэхэм япхыгъэ упчIэхэр ащ къыратыгъэх. Федеральнэ къэралыгъо бюджет учреждениеу «Эпидемиологиемрэ микро­биологием­рэкIэ ушэтэкIо гупчэу академикэу Н. Ф. Гамалея ыцIэ зы­хьы­рэм» ишIэныгъэ-лэ­жьхэр ары дунаимкIэ апэрэу мыщ фэдэ вакцинэ къыхэзыхыгъэхэр.

Джащ фэдэу район гупчэхэм ащыщ горэм дэс бзылъфыгъэр технологие пэрытхэр зыщагъэфедэрэ федеральнэ медицинэ учреждением нахь псынкIэу чIагъэгъолъхьанымкIэ IэпыIэгъу къыфэхъунэу депутатым къе­лъэIугъ. Зыкъызэрэфагъэзэгъэ Iофыгъохэр зэрэзэшIуахыхэрэм парламентарием тапэкIэ гъунэ лъифыщт.

— Тинепэрэ зэхэсыгъо медицинэ Iофыгъохэм афэгъэхьыгъагъ, федеральнэ гупчэм зэшIуихын фэе IофыгъохэмкIи зыкъысфагъэзагъ. Амал зэри­IэкIэ ахэмкIэ сфэлъэкIыщтыр зэкIэ сшIэщт. Врачхэм, шIэныгъэлэжьхэм, ме­дицинэ сест­ра­хэм акIуачIэ яшъыпкъэу зэ­рэ­рахьылIэрэм ишIуагъэкIэ хэгъэ­гуми рес­публикэми псауныгъэм икъэу­хъумэнкIэ яучреждениехэм охътэ мыпсынкIэр зэпачын алъэ­кIы, — къыIуагъ Хьасанэкъо Мурат.

ХэгъэунэфыкIыгъэн фае гъэ­цэкIэкIо хабзэм ифедеральнэ, иреспубликэ къулыкъухэм зэдырагъаштэу мы Iофтхьабзэр зэрэзэхащагъэр.

Къандор Анзор. Урысые Федерацием и Федеральнэ ЗэIукIэ и Къэралыгъо Думэ идепутат иIэпыIэгъу.