Iоныгъом и 1-м къыщегъэжьагъэу гриппым пэуцужьырэ вакцинэр цIыфхэм ахалъхьаныр рагъэжьагъ.

Мы зэпахырэ узым анахь пэшIуекIорэм вакцинэр ащыщ. Арышъ, ащ ишIуагъэ цIыфхэм алъагъэIэсыным медицинэм иIофышIэхэр мы уахътэм ыуж итых. Вакцинациер нахь Iэры­фэгъоу цIыфхэм акIуным пае кощырэ медицинэ пунктхэр тучанышхохэу «Лента», «Гипер-магнит» зыфиIохэрэм къащызэIуахынхэу рахъухьагъ. Бэ­­мышIэу щыIэгъэ пресс-зэ­IукIэм ар къыщиIуагъ «Роспотребнадзорым» Адыгэ Рес­публикэмкIэ и ГъэIорышIапIэ ипащэу Сергей Завгороднем.

— Прививкэр зыщахалъхьащт чIыпIэхэм ягъэпсын иIофыгъо мы мафэхэм тытегущыIэ. А шIыкIэу зигугъу къэтшIыгъэр республикэм щыпсэухэрэм- кIэ нахь Iэрыфэгъу хъунэу теплъы, — къыIуагъ Сергей Зав­городнем. — Уахътэ тыригъэ­кIуадэзэ медицинэ учреждением кIоным нахьи, щэфакIо зыщыкIорэм IофитIури цIыфым къызэдигъэцэкIэн ылъэкIыщт. Ау ащ пае паспортыр ыкIи медицинэ полисыр зыдиштэнхэ фае.

ШIоигъоныгъэ зиIэ пстэури поликлиникэхэм ыкIи амбулаториехэм къащызэIуахыгъэ кабинетхэм якIолIэнхэ амал яI. Ащ дакIоу, зыщыпсэухэрэм кIо­хэзэ прививкэр ахэзылъхьащт бригадэхэр зэхащагъэх.

Гъэсэныгъэм иучреждениехэми врачхэр кIохэзэ вакци­нациер рагъэкIокIы. Предприятиехэм ыкIи организациехэм куп-купэу ахалъхьанымкIэ лъэIу тхылъ къатын алъэкIыщт.

Вакцинэр зыхалъхьэ мыхъущтхэр: кIэнкIэ фыжьым (белок) аллергие фызиIэр, мэзих мыхъу­гъэ сабыир ыкIи ар зыгъашхэрэ ныр. Пэтхъу-Iутхъур къызэузыхэрэми (мэфи 10 — 14 темышIэу) ар ахаплъхьэ хъущтэп.

Вакцинациер зыщыкIощт мэзитIум къыкIоцI Адыгеим щы­псэурэ нэбгырэ мин 281-рэ (процент 60) къызэлъырагъэубытын гухэлъ яI.

Iэшъынэ Сусан.