Теуцожь районым ипсэупIэхэм гъэсэныгъэм иучреждение 17 адэт. Ахэм зэкIэми Iоны­гъом и 1-м илъэсыкIэ еджэгъум фэгъэхьыгъэ мэфэкI зэхахьэхэр зэращырекIокIыгъэм фэ­гъэхьыгъэ тхыгъэр къытфигъэхьазырыгъ Нэхэе Рэмэзанэ.

Районым гъэсэныгъэмкIэ игъэIорышIапIэ ипащэу Блэ­гъожъ Налбый гущыIэгъу зы­тэ­шIым, зэдгъэшIэнэу тызфэягъэр коронавирусым епхыгъэ къиныгъохэм тазыщыхэт лъэхъа­ным мэфэкI зэхахьэхэр зэрэзэхэщагъэхэр ары.

Блэгъожъ Налбый къытфиIотагъ зэкIэ IофшIэнхэр Роспотребнадзорымрэ республикэм гъэсэныгъэмрэ шIэныгъэмрэкIэ и Министерствэрэ къызэраIуагъэу зэрэрагъэкIокIыгъэр.

— ШIэныгъэм и Мафэ зэрэзэхатщэщтыгъэм фэдэ къабзэу мыгъи редгъэкIокIыгъ, — еIо Блэгъожъым. — Апэрэ оды­джыныри кIэлэцIыкIоу къыт­фыращэлIагъэхэм къафытед­гъэуагъ. Ау нахьыпэм цIыфэу къетщалIэщтыгъэм фэдиз тыугъоигъэп. ЗэкIэ тиеджапIэхэм къядгъэкIолIагъэхэр апэрэ клас­схэм якIэлэеджакIохэмрэ я 9-рэ ыкIи я 11-рэ классхэр къэзыухыхэрэмрэ.

ЗэпстэумкIи тиеджэпIэ 17-мэ къачIэхьажьыгъэр нэбгырэ 1839-рэ мэхъу. Апэрэ классхэм ащеджэщтхэр — 196-рэ, гъэрекIорэм тIэкIу нэмыIэми мы пчъагъэр зэрэнахьыбэр тигуапэу къэтэIо. Апэрэ классым анахьыбэу къызэращэлIагъэр Хьабэхъу Заремэ зипэщэ гурыт еджапIэр ары — нэ­бгырэ 54-рэ. Лъэустэнхьэблэ еджапIэми кIэлэцIыкIу 35-рэ къычIэхьагъ. Джащ фэдэу дэ­хэкIаеу Гъобэкъуаий, Аскэлаий, Очэпщыий къачIэхьагъэх.

Корр.: Тыщыгъуаз узыр зэпамыхыным фэшI, Роспотребнадзорым ыгъэуцугъэ шапхъэхэр агъэцакIэзэ Пэ­нэжьыкъое еджапIэм метрэ зытIу язэпэчыжьагъэу зэрэщагъэуцугъагъэхэм, нахьыбэхэм маскэхэр зэраIулъы­гъэм. Джы тыфэягъ ублэпIэ классхэм ащеджэхэрэр зэкIэ ыпкIэ хэмылъэу агъэшхэнхэу В. Путиным зэриIуагъэр зэрэжъугъэцэкIэщтым тыщыбгъэгъозэнэу.

Б. Н.: Ащи тыфэхьазырэу илъэ­сыкIэ еджэгъум тыпэ­хьа­жьыгъ. ТиеджэпIэ 17-у зигугъу къэсшIыгъэхэм яублэпIэ классхэм нэбгырэ 783-рэ ащеджэ. Ахэр зэкIэми гъомылэпхъэ стыр ыпкIэ хэмылъэу мафэм зэ арагъэшхыщт. Зэшхэгъум ыуасэр сомэ 56-рэ чапыч 69-рэ. Ыпэрэ илъэсхэм ар зыфэдизыгъэр сомэ 40. Яшхыщтыр рес­публикэм гъэсэныгъэмкIэ и Министерствэ къыщызэхагъэуцуагъ. Ар етIани мэфипшI тешIэ къэс къызэблахъущт. Зигугъу къэтшIыгъэ кIэлэеджэкIо 783-мэ гъомылапхъэу ашхырэм тефэрэ ахъщэр федеральнэ бюджетым къытIупщыщт.

— Ахэм язакъоп, я 5 — 11-рэ классхэм ащеджэхэрэри мафэм зэ агъэшхэщтых, — ипса­лъэ лъегъэкIуатэ Блэгъо­жъым. — Ахэри нэбгырэ 447-рэ мэхъух. Ау ахэм гъомылапхъэу къафатIупщырэм мылъкоу пэ­Iухьащтыр къыздикIыщтыр район бюджетыр ары.

Ахэм анэмыкIэу джыри нэбгырэ 25-рэ шъхьафэу тиеджапIэхэм мафэ къэс тIогъогогъо ащагъэшхэщтых. Ахэр зипсауныгъэкIэ щыкIагъэ зиIэхэр, унэгъо Iужъухэм къарыкIыхэрэр, зигъот макIэхэр арых.

Корр.: Зигугъу къэпшIы­гъэхэр Iофышхох. Шъуафэхьазыра?

Б. Н.: Ахэм ягъэцэкIэн аужырэ мэзэ зытIущым тыпылъыгъ. Тиклассхэри, тишхапIэхэри хьазырхэу тикIэлэеджакIохэр илъэсыкIэ еджэгъум фежьэжьыгъэх. ТипщэрыхьакIохэри опытышхо зиIэ IофышIэх. Коронавирусым кIэлэеджакIохэр щыухъумэгъэнхэм епхыгъэ шапхъэ­хэу профильнэ Министерствэмрэ Роспотребнадзорымрэ къагъэ­нафэхэрэр дэх имыIэу тиеджапIэхэм япащэхэм агъэцакIэ. Жьыр къэзыукъэбзырэ реци­куляторхэр тиеджапIэхэм ачIэтых, учреждениехэм ячIэхьапIэхэм термометрэхэр зыIыгъы­хэр аIутых.

Аущтэу тиIофхэр дэгъоу илъэ­сыкIэ еджэгъум тыпэхьажьын зыкIэтлъэкIыгъэр тирайон ипащэу Хьачмамыкъо Азэмат тэ тызэригъэгумэкIырэм нахь мымакIэу тинеущырэ мафэ зыфэдэщтыр зэлъытыгъэ тиныбжьыкIэхэм япIун, ялэжьын, шIэныгъэ куухэр ягъэгъотыгъэным, адыгэгъэ-цIыфыгъэ дахэ ахэлъэу щыIэныгъэм игъогушхо техьанхэм зэрэпылъыр, сыд фэ­дэ IофкIэ текIолIагъэми, къы­зэрэтфишIэрэр, тызэгурыIоу ты­­зэригъэлажьэрэр ары.

Нэхэе Рэмэзан. Сурэтым итхэр: Пэнэжьы­къое гурыт еджапIэм иапэрэ класс щеджэнхэу къычIэхьагъэхэ зэ­тIуазэхэу Хьабэхъу­хэу Да­нэ­рэ Айшарэ къащагъэх янэ­жъэу Хьабэхъу Муслъимэтрэ янэу Эммэрэ.