Зэзэгъыныгъэм зэдыкIэтхагъэх
УФ-м спортымкIэ и Министерствэрэ Адыгэ Республикэмрэ зэпхыныгъэ зэдыряIэу Iоф зэрэзэдашIэщтым фэгъэхьыгъэ зэзэгъыныгъакIэм зэдыкIэтхагъэх.
СпортымкIэ министрэу Олег Матыцинымрэ АР-м и ЛIышъхьэу КъумпIыл Муратрэ аIапэхэр зыкIадзэгъэ тхылъым лъэныкъо зэфэшъхьафэу Iоф зыщызэдашIэщтхэр щыгъэнэфагъэх. Ахэм зэу ащыщ лъэпкъ проектэу «Демографием» ипхырыщын пае атIупщыгъэ федеральнэ проектэу «Спортыр —щыIэныгъэм ишапхъ» зыфиIорэм игъэцэкIэн. Джащ фэдэу республикэм испорт инфраструктурэ игъэпсын, цIыфэу физкультурэм ыкIи спортым апыщагъэр нахьыбэ хъуным, ГТО-м ишапхъэхэр зыгъэцэкIэшъухэрэм япчъагъэ хэхъоным, кадрэхэм ягъэхьазырын япхыгъэ IофшIэнхэр лъагъэкIотэщтых.
Ахэм анэмыкIэуи Адыгеим нахь щыпэрыт спорт лъэпкъхэм IэпыIэгъу ятыгъэнэу, спортсменхэр зыщагъэхьазырхэрэ гупчэхэм хэхъоныгъэхэр ягъэшIыгъэнхэу, анахь IэпэIасэхэм якъыхэхынкIэ системэр гъэкIэжьыгъэнэу, резервхэм ягъэхьазырын нахьыбэу Iоф дэшIэгъэнэу агъэнэфагъ. Олег Матыциныр зэзэгъыныгъэу зыкIэтхагъэхэм къытегущыIэзэ, тапэкIи ащ тетэу Адыгеим чанэу Iоф дашIэным зэрэфэхьазырхэр, тхылъыр ащ фытегъэпсыхьэгъэ программэу зэрэщытыр къыкIигъэтхъыгъ.
— Инфраструктурэу республикэм щагъэпсыгъэмрэ гухэлъэу ЛIышъхьэм зигугъу къышIыгъэхэмрэ неущырэ мафэмкIэ гугъэпIэ инхэр къатых. Республикэм ирайонхэм ащыпсэухэрэм физкультурэмрэ спортымрэ апылъынхэм пае амалышIухэр аратыгъэх. ЦIыфхэм япсауныгъэ къыщымыкIэнымкIэ, псэукIэ амалэу яIэр нахьышIу хъунымкIэ непэ ар анахь шъхьаIэу щыт. УФ-м и Президент къыгъэуцугъэ пшъэрылъыр, процент 70-м къыщымыкIэу спортым пылъынхэу шIыгъэныр, гъэцэкIэгъэнымкIэ ищыкIэгъэ пстэур тэ зэшIотхыщт. Адыгеими а программэр зэрэщыпхыращыщтым сицыхьэ телъ, — къыIуагъ УФ-м спортымкIэ иминистрэ.
АР-м и ЛIышъхьэ ащ зыфигъазэзэ, тишъолъыр физкультурэмрэ спортымрэ защаушъомбгъунымкIэ IэпыIэгъушхо къызэрэратырэм фэшI «тхьашъуегъэпсэу» риIуагъ.
— Министерствэмрэ республикэмрэ Iофэу зэдашIэрэм мымакIэу шIуагъэ къетышъ, тапэкIэ дгъэнэфагъэхэри пхырыщыгъэ зэрэхъущтым сицыхьэ телъ. Адыгеими пшъэрылъэу зыфигъэуцужьыгъэхэр хэзыгъэ имыIэу ыгъэцэкIэщтых, — къыIуагъ КъумпIыл Мурат.
ХЪУТ Нэфсэт.